कानून कार्यान्वयनमा दशकौंको दीपक अनुभवले ल्याउँला त प्रहरीमा उज्यालो ?

नेपाल प्रहरीको ३१औं प्रहरी महानिरीक्षक (आईजीपी) पदमा दीपक थापा नियुक्त भएका छन्। सोमबार बसेको मन्त्रिपरिषद् बैठकले उनलाई प्रहरी प्रमुखको रूपमा नियुक्त गर्ने निर्णय गरेको हो। आईजीपी वसन्त कुँवरको अवकाशपछि थापालाई नेपाल प्रहरीको सर्वोच्च पदमा नियुक्त गरिएको हो।

दीपक थापाको जन्म २०२८ मंसिर ८ गते भक्तपुर जिल्लाको सूर्यविनायक नगरपालिका सिपाडोलमा भएको हो। प्रारम्भिक शिक्षा उनले आफ्नै गृह जिल्लाबाट पूरा गरे। त्यसपछि उनले कानून, राजनीतिशास्त्र र जनप्रशासन विषयमा उच्च शिक्षा हासिल गरेका छन्।

२०५२ भदौ १९ गते नेपाल प्रहरीमा प्रवेश गरेका थापा प्रहरी सेवामा तीन दशकभन्दा बढी समय बिताइसकेका छन्। प्रहरी सेवामा उनले विभिन्न महत्वपूर्ण जिम्मेवारी निर्वाह गरेका छन्। इलाका प्रहरी कार्यालय प्रमुखका रूपमा उनले बनेपा, बुटवल र रौतहटमा सेवा गरे।

उनले नेपाल प्रहरी स्कूलका प्रमुखका रूपमा साँगा, डोटी र रौतहटमा आफ्नो अनुभव विस्तार गरे।

जिल्ला प्रहरी कार्यालयमा उनले रुकुम, खोटाङ, सुनसरी, मोरङ, मकवानपुर र चितवनमा सेवा गरे। त्यसपछि उनले काठमाडौं उपत्यका अपराध अनुसन्धान कार्यालयको प्रमुखका रूपमा नेतृत्वदायी भूमिका निर्वाह गरे। बागमती प्रदेश प्रहरी कार्यालय प्रमुख हुँदै नेपाल प्रहरी प्रधान कार्यालयको प्रबन्ध निर्देशनालय प्रमुख बने। उनले प्रशासन विभाग, प्रहरी प्रधान कार्यालय नक्साल काठमाडौं तथा हाल केन्द्रीय अनुसन्धान ब्यूरोको नेतृत्व गरिरहेका छन् ।

प्रहरी सेवामा रहँदा उनले थुप्रै गम्भीर अपराध अनुसन्धानको नेतृत्व गरेका छन्। भुटानी शरणार्थी प्रकरण, टिकापुर जग्गा प्रकरण, सहकारी ठगी मुद्दा, बालमन्दिर जग्गा हिनामिना जस्ता गम्भीर विषयमा उनले प्रभावकारी अनुसन्धान गरेका छन्। अनुसन्धानमा उनको दक्षता र इमान्दारीका कारण प्रहरी संगठनभित्र उनी एक कुशल अधिकृतका रूपमा परिचित छन्।

उनले संयुक्त राष्ट्रसंघका दुई वटा शान्ति मिसन (सुडान र लाइबेरिया) मा सेवा गरिसकेका छन्। उनले विदेशमा १४ वटा तालिम र स्वदेशमा ११ वटा तालिम लिएका छन्।

थापाले आफ्नो सेवाकालमा विभिन्न पदक, प्रशंसा पत्र र नगद पुरस्कारहरू प्राप्त गरेका छन्। उनले प्रवल जनसेवाश्री, सुप्रवल जनसेवाश्री तथा संयुक्त राष्ट्रसंघबाट ३ वटा पदकसहित ८ वटा विभूषण प्राप्त गरेका छन्। उत्कृष्ट प्रहरी व्यवस्थापक तथा दैवी प्रकोप व्यवस्थापनमा योगदान पुर्‍याएको भन्दै उनले १६ वटा प्रशंसा पत्र तथा २१ वटा नगद पुरस्कार प्राप्त गरेका छन्।

दीपक थापा नेपालको प्रहरी संगठनभित्र दृढ नेतृत्व, अनुशासन र दक्षता भएका अधिकृतका रूपमा परिचित छन्। उनले अपराध अनुसन्धान, मानव संसाधन व्यवस्थापन तथा विपद् व्यवस्थापनमा विशेष अनुभव बटुलेका छन्। प्रहरी सेवामा लामो अनुभव तथा उत्कृष्ट कार्य सम्पादनका कारण उनी नेपाल प्रहरीको सर्वोच्च पदमा पुग्न सफल भएका हुन्।

थापाको नियुक्ति एक महत्वपूर्ण समयमा भएको छ जब नेपालले संगठित अपराध, साइबर खतरा र विपद् तयारी लगायत बढ्दो सुरक्षा चुनौतीहरूको सामना गरिरहेको छ। उनको नेतृत्वले प्रहरी रणनीतिहरूमा सुधार ल्याउने, कानून प्रवर्तन दक्षता सुधार गर्ने र नेपाल प्रहरीमा जनताको विश्वास बढाउने अपेक्षा गरिएको छ।

व्यावसायिक इमान्दारिता र प्रशासनिक विशेषज्ञताको इतिहास बोकेका थापाले नेपाल प्रहरीलाई आधुनिकीकरण र सार्वजनिक सेवामा सुधार ल्याउने दिशामा नेतृत्व गर्न तयार छन्। उनको कार्यकाल देशभरि कानून र व्यवस्था सुदृढ गर्न अपराध रोकथाम, संस्थागत विकास र सुरक्षा नीतिहरूको प्रभावकारी कार्यान्वयनमा केन्द्रित हुने अपेक्षा गरिएको छ।