राजावादीको प्रदर्शनलाई मध्यनजर गर्दै काठमाडौंमा उच्च सुरक्षा सतर्कता
२५ फागुन २०८१ ८:५१
फाइल तस्बिर
पूर्वराजा ज्ञानेन्द्र शाह पोखराको एक साता बसाइँपछि काठमाडौं फर्किंदा राजावादी दल र समूहहरुले उनको स्वागतमा प्रदर्शन गर्दैछन् ।
उनीहरुको प्रदर्शनलाई मध्यनजर गरी काठमाडौंमा सुरक्षा व्यवस्था कडा पारिएको छ । आज बिहानैबाट काठमाडौंका चोकचोकमा बर्दीसहितका र सादा पोशाकका गुप्तचर टोली परिचालित छन् ।
आज बिहानैदेखि काठमाडौंको नारायणहिटी दरबार संग्रहालय, त्रिभुवन अन्तर्राष्ट्रिय विमानस्थल सहितका संवेदनशील पहिचान गरिएका क्षेत्र र मुख्य चोकहरुमा सुरक्षाकर्मीको तैनाथी बढाइएको नेपाल प्रहरीको प्रवक्ता डीआईजी दिनेश आचार्यले बताए । भिडभाड र जुलुस अनियन्त्रित हुनसक्ने स्थान विश्लेषण गरी आवश्यक सुरक्षा रणनीति बनाइएको उनले बताए
पूर्वराजा ज्ञानेन्द्र शाह पोखराबाट आज दिउँसो काठमाडौं आउँदैछन् । उनको स्वागतका लागि राजावादीहरु काठमाडौंका विभिन्न स्थानबाट जुलुससहित त्रिभुवन अन्तर्राष्ट्रिय विमानस्थलको गेट अगाडि भेला हुने तयारीमा छन् ।
यही सन्दर्भमा काठमाडौंका प्रमुख जिल्ला अधिकारी ऋषिराम तिवारीको अध्यक्षतामा जिल्ला सुरक्षा समितिको बैठक समेत बसेको थियो । बैठकमा भिड अनियन्त्रित भई हुलहुज्जत, अमर्यादित, अवाञ्छित र गैरकानुनी क्रियाकलाप हुनसक्ने भएकाले त्यसलाई रोक्ने तयारीबारे छलफल भएकोे थियो ।
साथै सुरक्षा प्रबन्धका लागि ‘आवश्यक मात्रा’मा सुरक्षाकर्मी परिचालन गर्ने निष्कर्ष निकालिएको एक अधिकारीले बताए । ‘आवश्यक परे चारवटै सुरक्षा निकाय परिचालित गरिन्छ,’ स्रोतले भन्यो ।
सम्बन्धित समाचार
प्रतिक्रिया