प्रकृति लम्साल मृत्यु प्रकरण : मृतक विद्यार्थीलाई न्याय दिलाउने उडिसाका मुख्यमन्त्रीको आश्वासन

उडिसाका मुख्यमन्त्री मोहनचरण माझीले केआईआईटी विश्वविद्यालयकी नेपाली विद्यार्थी प्रकृति लम्सालको मृत्यु प्रकरणमा पिडितलाई न्याय दिइने नेपाली अधिकारीलाई आश्वासन दिएका छन् ।

नेपाली काउन्सिलर सञ्जीव दास शर्मा र नवीनराज अधिकारीसँगको कुराकानीमा उनले विश्वविद्यालय क्याम्पसमा शान्ति र सामान्य अवस्था कायम हुने समेत बताए ।

मुख्यमन्त्रीले नेपाली विद्यार्थीहरूलाई फर्केर आफ्नो पढाइलाई निरन्तरता दिन आग्रह गर्दै उनीहरूको सुरक्षा र कल्याण सुनिश्चित गर्न राज्य सरकारको प्रतिबद्धतामा जोड दिए।

भुवनेश्वरस्थित स्टेट गेष्ट हाउसमा नेपालका अधिकारीहरूसँगको अवस्थाबारे चिन्ता सम्बोधन गर्न उच्चस्तरीय छलफल भएको थियो । बैठकमा मुख्य सचिव मनोज आहुजासहित ओडिशाका मन्त्रीहरू मुकेश महालिंग र सूर्यवंशी सुरज उपस्थित थिए। छलफलमा क्याम्पसको स्थायित्व पुनर्स्थापना र नेपाली विद्यार्थी समुदायको चासोलाई सम्बोधन गर्ने विषयमा केन्द्रित थियो ।

यसैबीच नेपालका परराष्ट्रमन्त्री डा आरजु राणा देउवाले पनि उडिसाका मन्त्री सूर्यवंशी सुरजसँग टेलिफोनमा वार्ता गर्दै घटनाप्रति नेपालको चासो व्यक्त गरेका छन् ।

उडिसा सरकारले यस मामिलामा द्रुत समाधान र न्याय ल्याउने लक्ष्य राख्दै गहिरो अनुसन्धान र सबै विद्यार्थीहरूको सुरक्षाको लागि आफ्नो प्रतिबद्धता दोहोर्याएको छ।