रविसँगै पत्नी निकितालाई सम्पत्ति शुद्धीकरणको मुद्दा, सम्पत्ति जफत गर्न माग

राष्ट्रिय स्वतन्त्र पार्टीका सभापति रवि लामिछानेकी पत्नी निकिता पौडेलविरुद्ध पनि सम्पत्ति शुद्धीकरणको मुद्दा दर्ता गरिएको छ ।

सरकारी वकिलको कार्यालयले लामिछानेसँगै पत्नी निकितालाई पनि प्रतिवादी बनाउँदै सम्पत्ति शुद्धीकरणको मुद्दा दर्ता गरेको हो ।

निकिताको नाममा देखिएको अवैध सम्पत्ति जफत गर्ने प्रयोजनका लागि मुद्दा दायर गरिएको हो । सम्पत्ति जफत प्रयोजन शीर्षकमा निकितासहित ५ जनालाई प्रतिवादी बनाइएको छ ।

यस प्रयोजनका लागि निकितासहित पद्मा बञ्जाडे, रोचक जोशी, राधा पछाई र मिना पछाईलाई प्रतिवादी बनाइएको हो । उनीहरूको हकमा अदालतबाट कानुन बमोजिम हुने गरी मुद्दा अघि बढाइएको छ ।

रविको मात्रै २७ करोड भन्दा बढीको बिगो माग दाबी गरिएको छ । सम्पत्ति शुद्धीकरणमा मात्रै २७ करोड ८९ लाख ४४ हजार ७०५ रुपैयाँको स्रोत नखुलेको हो ।

उनीसँगै पूर्व डिआइजी छविलाल जोशीको ७४ करोड ३४ लाख ७१ हजार ५५ रुपैयाँको स्रोत नखुलेको हुँदा उक्त रकम माग दाबी गरेको हो । उनीहरूसँगै जिबी राईको पनि सम्पत्ति जफत गर्न माग गरिएको छ ।

आइतबार दर्ता गरिएको पूरक अभियोग पत्रमा ४४ जनालाई प्रतिवादी बनाइएको छ। जसमध्ये ३१ जनालाई सहकारी ठगीमा मात्रै कसुर दायर भएको हो ।

आठ वटा कम्पनी र पाँच जनाविरुद्ध सम्पत्ति शुद्धीकरणको मुद्दा दायर भएको हो । सम्पत्ति शुद्धीकरणमा रवि, छवि, जिबी, उनका साझेदार रामप्रसाद खनाल र लीला पछाईविरूद्ध मुद्दा दायर भएको हो ।

यसअघि सरकारी वकिलले शुक्रवार जिबी राईसहित १९ जनाविरुद्ध थप अभियोग दर्ता गरेको थियो ।