न्यायालय लयमा फर्कियो, अब गरिमामय बनाउनु पर्छ : प्रधानन्यायाधीश राउत

प्रधानन्यायाधीश प्रकाशमान सिंह राउतले न्यायालय लयमा फर्किएको बताएका छन् ।

शनिबार वरिष्ठ अधिवक्ता प्रमाणपत्र वितरण कार्यक्रमलाई सम्बोधन गर्दै राउतले लयमा फर्किएको न्यायालय मात्रै आफूहरूले नचाहेको भन्दै न्यायालयलाई गरिमामय बनाउनुपर्ने आवश्यकता रहेको उल्लेख गरेका हुन् ।

उनले न्यायालय आफैँ गरिमामय नबन्ने भन्दै न्यायालयलाई गरिमामय बनाउने काम सबै कानुन व्यवसायीहरूको भएको बताए । उनले भने,‘तपाईं हाम्रा अथक प्रयासबाट न्यायालय लयमा फर्किएको छ । लयमा फर्किएकोमा मात्रै चित्त बुझाउने हो की ? न्यायालयलाई गरिमामय पनि बनाउने हो ? यो आफैँ गरिमामय त बन्दैन है । न्यायालयलाई गरिमामय बनाउने जिम्मेवारी वर्तमान परिवेशले हामीलाई सुम्पिएको छ । अब यहीँनेर हामीले आफूलाई निर्मम तवरले समीक्षा गर्नुपर्ने देखिन्छ । हामी हाम्रो न्यायालयलाई गरिमामय बनाउन गइरहेका छौँ की छैनौँ, हाम्रा गतिविधि र भूमिकाहरू त्यसतर्फ उन्मुख छन् की छैनन् ? प्रबुद्ध वर्गले यो विचार गर्नुपर्ने भएको छ । गरिमामय न्यायालयको वा स्वच्छ न्यायालयको वा पवित्र न्यायालयको न्यायमूर्ति हुने चाहना राख्ने हो भने हामीसँग त्यसले त्याग, समर्पण, गहिरो अध्ययन, पवित्रता र सार्थकताको डिमान्ड गर्दछ । त्यसका लागि हामी तयार छौँ ? म तयार छु । साथ सहयोग पाए र तपाईंहरुसँग सहकार्य गर्न सके न्यायालय गरिमामय नहुने कुरै छैन । एक पटक प्रयास त गरौँ ।’

प्रधानन्यायाधीश राउतले वरिष्ठ अधिवक्ताहरूले नैतिकताको लक्ष्मण रेखाभित्र आफूलाई राख्न सक्नुपर्ने बताए । न्यायालयलाई गरिमामय र स्वच्छ बनाउनका लागि आफू तयार रहेको भन्दै उनले त्यसैका लागि सुधारका धेरै प्रयास थालिएको जानकारी दिए ।