ट्रम्प प्रशासनको नयाँ संरचनामा निक्की हेली र माइक पोम्पेओलाई सहभागी नगराउने निर्णय

अमेरिकाका नवनिर्वाचित राष्ट्रपति डोनाल्ड ट्रम्पले आफ्नो नयाँ प्रशासनको संरचनामा पूर्व राजदूत निक्की हेली र पूर्व विदेश मन्त्री माइक पोम्पेओलाई सहभागी नगराउने निर्णय गरेका छन्।

ट्रम्पले सामाजिक सञ्जालमार्फत उक्त जानकारी दिएका छन् र हेली तथा पोम्पेओसँग अघिल्लो कार्यकालमा भएको सहकार्यलाई स्मरण गर्दै उनीहरूको योगदानको सराहना पनि गरेका छन्।

ट्रम्पले आफ्नो स्ट्याटसमा भनेका छन्, ‘मैले पूर्व राजदूत निक्की हेली र पूर्व विदेश मन्त्री माइक पोम्पेओलाई वर्तमानमा निर्माणाधीन ट्रम्प प्रशासनमा सामेल नगराउने निर्णय गरेको छु। उनीहरूसँग पहिलेको सहकार्य मलाई निकै मन पर्‍यो र त्यसको लागि म उनीहरूलाई हाम्रो देशको सेवा गरेकोमा धन्यवाद दिन चाहन्छु।’

पूर्व राष्ट्रपति ट्रम्पले आगामी प्रशासन निर्माणको तयारीमा रहेको संकेत गर्दै आफ्नो प्रसिद्ध नारा ‘अमेरिकालाई महान् बनाऔँ’ लाई पुनः दोहोर्‍याएका छन्, जसबाट उनले पुनः अमेरिकी राजनीतिमा आफ्नो सक्रियता बढाउने संकेत गरेका छन्।

को हुन् हेली र पोम्पेओ ?

निक्की हेली र माइक पोम्पेओ अमेरिकी राजनीतिका प्रमुख व्यक्तित्वहरू हुन्, जसले डोनाल्ड ट्रम्पको प्रशासनमा महत्त्वपूर्ण भूमिका निर्वाह गरेका थिए।

निक्की हेलीले २०११ देखि २०१७ सम्म दक्षिण क्यारोलिनाको गभर्नरको रूपमा सेवा गरिन् र २०१७ देखि २०१८ सम्म संयुक्त राष्ट्रसंघमा अमेरिकी राजदूतको भूमिका निर्वाह गरेकी थिइन् ।

रिपब्लिकन पार्टीकी हेलीले २०२४ को अमेरिकी राष्ट्रपति चुनावमा उम्मेदवारी घोषणा गरेकी थिइन् । त्यस्तै वेस्ट प्वाइन्ट सैन्य एकेडेमीबाट स्नातक गरेपछि अमेरिकी सेनामा सेवा गरेका माइक पोम्पेओले पछि कानुनी क्षेत्रमा काम गरे।

२०१७ मा उनले केन्द्रीय गुप्तचर एजेन्सी(सिआइए)को निर्देशकको रूपमा काम गरे र त्यसपछि २०१८ देखि २०२१ सम्म अमेरिकी विदेश मन्त्री बने।