विश्वकप लिग-२ : भीम सार्की र करण केसीले स्कटल्यान्डसंगको ‘म्याच’ नखेल्ने

आइसीसी क्रिकेट वर्ल्डकप लिग–२ मा करण केसी र भीम सार्कीले स्कटल्याण्डविरूद्धको खेल गुमाएका छन् । केसी र सार्की घाइते भएकाले नखेल्ने भएको नेपाल क्रिकेट संघ (क्यान) ले जनाएको छ । अमेरिकाको डालासमा नेपाली समयअनुसार आज राति सवा १० बजे स्कटल्याण्डविरूद्ध खेल्दैछ ।

केसी र सार्कीको सट्टामा देव खनाल र सागर ढकालले खेल्ने भएका हुन् । यसअघि आइतबार बिहान सकिएको खेलमा नेपाल अमेरिकासँग ३७ रनले पराजित भएको थियो । अमेरिकाले दिएको २८२ रनको लक्ष्य पछ्याउने क्रममा एक बल बाँकी हुँदा नेपालले २४४ रन बनाएको थियो ।

त्यसअघि गत बुधबार स्कटल्याण्डविरूद्ध भएको खेललमा नेपालले ५ विकेटले जित हात पारेको थियो । लिग–२ मा नेपालले लगातार सात खेल हार व्यहोरेपछि जीत निकालेको हो । अमेरिकाविरूद्ध भएको पहिलो खेलमा नेपाल ३ विकेटले पराजित भएको थियो । नेपाल लिग–२को सातौ स्थानमा छ । अन्तिममा युएई छ भने पहिलो स्थानमा अमेरिका छ ।