नेपालका लागि दिगो विकासको बाटो अत्यावश्यक र अपरिहार्य : उपप्रधानमन्त्री पौडेल

उपप्रधानमन्त्री एवं अर्थमन्त्री विष्णुप्रसाद पौडेलले नेपालका लागि दिगो विकासको बाटो अत्यावश्यक र अपरिहार्य भइसकेको बताएका छन्। शनिबार काठमाडौंमा आयोजित एक कार्यक्रमलाई सम्बोधन गर्दै उनले यस्तो बताएका हुन्। उनले नेपालले नीति, कार्यक्रम र पहलहरुमार्फत वातावरणीय र जलवायु चुनौतीहरुको सामना गर्न महत्वपूर्ण कदमहरु उठाएको जिकिर गरे।

उनले सरकारले उठाएका कदमलाई अझ प्रभावकारी बनाएर अघि बढाउनुपर्ने आवश्यकता रहेको उल्लेख गरे। उनले जलवायु परिवर्तन नीतिले विकास योजना निर्माणमा जलवायु अनुकूलतालाई समावेश गर्ने रणनीतिक ढाँचा प्रदान गरेको उल्लेख गर्दै अन्तर्राष्ट्रिय साझेदारसँग मिलेर हरित जलवायु कोष जस्ता संयन्त्रहरुमार्फत जलवायु वित्तमा पहुँच विस्तार गरिरहेको बताए।

उनले वित्तीय संस्थाहरुमा नविकरणीय ऊर्जा, वातावरणमैत्री पूर्वाधार र जलवायुअनुकूल कृषि क्षेत्रमा लगानी गर्न प्रोत्साहन गर्न जरुरी रहेको बताए। अर्थमन्त्री पौडेलले नेपालसँग हरित अर्थतन्त्रको मेरुदण्ड बन्नसक्ने विशाल प्राकृतिक श्रोतहरु रहेको भन्दै जलविद्युतको सम्भावना अझै धेरै हदसम्म उपयोग हुन बाँकी रहेको बताए।

उनले नविकरणीय ऊर्जामा गरिने लगानीले घरेलु ऊर्जाको आवश्यकता पूरा गर्न मात्र नभई छिमेकी मुलुकलाई स्वच्छ ऊर्जा निर्यात गरेर क्षेत्रीय स्थायित्व र आर्थिक वृद्धिमा योगदान गर्नसक्ने बताए।

उनले भने, ‘नेपालका लागि दिगो विकासको बाटो अत्यावश्यक र अपरिहार्य भइसकेको छ भन्ने सच्चाईलाई ग्हिरोसँग महशुस गर्नुपर्छ। म हाम्राअघि रहेका चुनौतिहरुप्रति पनि पूर्ण रुपमा सचेत छु। समाधान सम्भव छ भन्नेमा पनि आशावादी छु। नेपालले नीति, कार्यक्रम र पहलहरुमार्फत वातावरणीय र जलवायु चुनौतिहरुको सामना गर्न महत्वपूर्ण कदमहरु उठाएको छ।’

उपप्रधानमन्त्री पौडेलले आर्थिक प्रगति र पर्यावरणीय संरक्षणलाई सन्तुलित रुपमा अघि बढाउन आवश्यक रहेको बताए। नेपाल आफ्नै गतिमा आर्थिक विकासको मार्गमा अघि बढिरहेको बतउनु भयो। विकास मोडलले वातावरणीय अनुकूलता, दिगोपन र समानतालाई प्राथमिकता दिनुपर्ने बताए।