घुससहित पक्राउ परेका इन्जिनियरसहित तीन जना दोषी ठहर

घुससहित पक्राउ परेका पोखरा महानगरपालिकाका इन्जिनियरसहित ३ जना दोषी ठहर भएका छन् ।

घुससहित पक्राउ परेका इन्जिनियर शिवप्रसाद बराल, सब इन्जिनियर उषाकिरण रोकाया र बिचौलिया सुरज कुँवरलाई विशेष अदालत काठमाडौँले दोषी ठहर गरेको हो । विशेष अदालतका न्यायाधीशद्वय खुसीप्रसाद थारु र रितेन्द्र थापाको संयुक्त इजलासले उनीहरूलाई दोषी ठहर गरेको हो ।

घर निर्माणको नक्सा प्रमाणपत्र दिने क्रममा घुससहित पक्राउ परेका उनीहरू अदालतबाट दोषी ठहर भएका हुन् । अदालतले इन्जिनियर बराल र सब-इन्जिनियर रोकायालाई जनही १ लाख ७५ हजार रुपैयाँ जरिवाना र ८ महिना कैद सजाय सुनाइएको छ । घुस दिन मतियारको रूपमा काम गरेका सुरजलाई विशेष अदालतले आधा अर्थात् ८७ हजार ५ सय रुपैयाँ जरिवाना र ४ महिना कैद सजायको फैसला सुनाएको छ । साथै प्रतिवादी बरालले बैंकमा दाखिला गरेको घुस रकम दुई लाख रुपैयाँ जफत गरी उजुरीकर्तालाई भराइदिन भनिएको छ ।

अख्तियार दुरुपयोग अनुसन्धान आयोगले गत चैत २८ गते पोखराबाट १ लाख ५० हजार रुपैयाँ घुससहित सब इन्जिनियर उषाकिरण र गोदार इन्जिनियरिङ कन्सल्टेन्सी सेवाका सुरजलाई रंगेहात पक्राउ गरेको थियो । अनुसन्धानका क्रममा नाम जोडिएपछि केही दिनपछि अख्तियारले इन्जिनियर शिवप्रसादलाई पनि पक्राउ गरेको थियो ।

अनुसन्धानपछि अख्तियारले गत वैशाख २० गते विशेष अदालतमा मुद्दा दायर गरेको थियो । अनुसन्धानका क्रममा घुसबापतको दुई लाख रुपैयाँ इन्जिनियर बरालको खातामा गएको देखिएको थियो ।