भारत भ्रमणमा जाँदै परराष्ट्रमन्त्री राणा

परराष्ट्रमन्त्री डा. आरजु राणा देउवा भारत भ्रमणमा जाने भएकी छन् । उनी भदौ २ देखि ६ गतेसम्म भारतको पाँचदिने भ्रमणमा जाने भएकी हुन् ।

उनी नेतृत्वको प्रतिनिधिमण्डललाई भारत भ्रमणमा जान बिहीबारको मन्त्रिपरिषद बैठकले स्वीकृति दिएको छ ।

यस्तै मन्त्रिपरिषद बैठकले अन्य दुई मन्त्रीको विदेश भ्रमण पनि स्वीकृत गरेको छ ।

आगामी असोज ९ र १० गते उज्वेकिस्तानको समरखण्डमा आयोजना हुने एसियाली पूर्वाधार लगानी बैंकको बोर्ड अफ गभर्नर्सको नवौं वार्षिक बैठकमा सहभागी हुन उपप्रधान एवं अर्थमन्त्री विष्णुप्रसाद पौडेल नेतृत्वको प्रतिनिधिमण्डललाई स्वीकृति दिइएको छ ।

त्यसैगरी भारतमा भदौ ७ देखि ९ गतेसम्म आयोजना हुने आठौं अन्तर्राष्ट्रिय धर्मधम्मा सम्मेलनमा सहभागी हुन संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे नेतृत्वको प्रतिनिधिमण्डललाई स्वीकृति दिइएको हो ।