सुनको मूल्य तोलाको डेढ लाख

सुनको मूल्यले नयाँ कीर्तिमान कायम गरेको छ । लगातार उकालो लागेको सुनको मूल्यमा आजको वृद्धिपछि हालसम्मकै उच्च बिन्दुमा पुगेको हो ।

नेपाल सुनचाँदी व्यवसायी महासंघका अनुसार छापावाला सुन प्रतितोला एक लाख ५० हजार रूपैयाँ कायम भएको छ । आइतबार छापावाला सुन प्रतितोला एक लाख ४९ हजार सात सय रूपैयाँमा कारोबार भएको थियो । आइतबारको तुलनामा सोमबार छापावाला सुन प्रतितोला तीन सय रूपैयाँले वृद्धि भएको हो ।

यस्तै तेजाबी सुनको मूल्य प्रतितोला तीन सय रूपैयाँले वृद्धि भएको छ । आइतबार प्रतितोला एक लाख ४९ हजार दुई सय रूपैयाँमा कारोबार भएको तेजाबी सुन आजका लागि एक लाख ४९ हजार पाँच सय रूपैयाँ निर्धारण भएको छ ।

चाँदीको मूल्य भने स्थिर रहेको छ । चाँदी प्रतितोला एक हजार सात सय ८५ रूपैयाँमा कारोबार भइरहेको महासंघले जनाएको छ ।