बिमा रकम दाबी गर्न आफ्नै पसलमा आगो लगाउने दुई जना पक्राउ
२० साउन २०८१ २०:३३
बिमा रकम दाबी गर्न पोखराको लेकसाइडमा रहेको आफ्नै पसल (सपिङ सेन्टर) मा आगजनी गरेको आरोपमा प्रहरीले दुई जनालाई पक्राउ गरेको छ ।
पोखरा–६ नारेश्वरचोकमा साउन १६ को बिहान आफ्नै पसलमा आगजनी गर्ने ड्यामसाइडका ३६ वर्षीय सुजन गहतराज र उनका साथी बिरौटाका ४३ वर्षीय पवन नेपाल शनिबार पक्राउ परेका हुन् । स्थानीय थानेश्वर पहारीको घर भाडामा लिएर सुजनले मुक्तिनाथ सपिङ सेन्टर चलाएका थिए । साउन १६ को बिहान २ बजेतिर पसलमा आगलागी भएको प्रहरीले खबर पायो । प्रहरी, सशस्त्र प्रहरी बल, पोखरा महानगरपालिकाको दमकल र स्थानीयको प्रयासमा ३ बजेतिर आगो नियन्त्रणमा आयो ।
सुजनले आफूले केही दिनअघि नयाँ इन्भर्टर जडान गरेको र उक्त इन्भर्टरको वायरिङबाट सर्ट भई आगो लागेको प्रहरीलाई बताए । उनले पसलको बिमा नगराएको समेत प्रहरीलाई बताएका थिए । प्रहरीले अनुसन्धानका क्रममा इन्भर्टर जडान गर्ने व्यक्तिसँग बुझ्दा इन्भर्टरबाट आगो नलाग्ने बरु जोड्ने क्रममा बिग्रन सक्ने जानकारी पायो । विद्युत् प्राधिकरणले पनि आफ्नो तर्फबाट कुनै कैफियत नरहेको जवाफ दियो ।
घटना शंकास्पद देखिएपछि प्रहरीले अनुसन्धानको सुइ सुजनतिरै सोझायो । उनले गत असार १५ मा हिमालयन एभरेस्ट इन्स्योरेन्स लिमिटेडको न्युरोड कार्यालयबाट पसलको बिमा गरेको र आगलागी भएको भोलिपल्ट साउन १७ मा बिमा दाबी गर्दै निवेदन दिएको तथ्य प्रहरीले फेला पार्यो । त्यसै दिन उनले आफ्नो पसलमा के कसरी आगो लागेको भनी थप अनुसन्धान गर्न वडा प्रहरी कार्यालय बैदाममा निवेदन बुझाएका थिए । अनुसन्धानका क्रममा हिमालयन एभरेस्ट इन्स्योरेन्स लिमिटेडमा सुजनले २ करोड १० लाख बराबरको बिमा गरेको फेला परेको कास्कीका प्रहरी प्रमुख एसपी मोहनकुमार थापाले बताए ।
उनका अनुसार सुजनले आफ्नो पसल नचलेको, सामान धेरै स्टक रहेको र घरबेटीसँग भाडाका विषयमा विवाद भइरहेको कुरा पवनलाई सुनाउँछन् । पवनले पश्चिमाञ्चल एकीकृत कृषि केन्द्रबाट आफूले सञ्चालन गरेको सफल पोल्ट्री फार्ममा आगो लाग्दा बिमा कम्पनीबाट ३१ लाख रुपैयाँ पाएको सुजनलाई सुनाउँछन् । उनको कुराबाट सुजन प्रभावित हुन्छन् र आफ्नो पसलमा जानाजान आगजनी गर्ने योजना बुन्छन् ।
सुजन र पवनले पानी परेको दिन सबै सुत्ने र मानिसको चहलपहल नहुने भएकाले त्यही बेला पसलमा आगो लगाउने योजना बनाउँछन् । योजना मुताबिक साउन १५ को राति सुजनले आफ्नो गाडीमा स्प्रिट राख्छन् । राति ११ बजे पवनसँग भेट हुन्छ । खानपिन गरेपछि उनीहरु गाडी लिएर पसलमा पुग्छन् । दुवै जना १०/१५ मिनेट पसलको भित्रबाहिर गर्छन् ।
प्रहरीले प्राप्त गरेको सीसीटीभी दृश्यमा सुजनले सटर लगाएर हतारहतार त्यहाँबाट निस्किएर गाडी चढेको देखिन्छ । गाडी हिँड्न सुरु भएपछि पवनले सलाइ बालेर एक्कासि आगो सल्काउँछन् । उनी गाडीको पछिपछि गएर चढ्छन् र त्यहाँबाट निस्कन्छन् । प्रहरीसँगको बयानमा सुजनले बिमा रकम दाबी गर्न पवनसँग मिलेर योजना बनाइ आफ्नै पसलमा आगजनी गरेको बताएका छन् । दुवैलाई आपराधिक उपद्रव गर्न नहुने शीर्षकमा मुद्दा दर्ता गरी जिल्ला अदालतबाट ७ दिन म्याद थप गरी अनुसन्धान भइरहेको छ ।
सम्बन्धित समाचार
प्रतिक्रिया