एमाले-कांग्रेस मिलेर सरकार बनेसँगै जनतामा आशा पलाएको छ : महेश बस्नेत

नेकपा (एमाले) का पोलिटब्यूरो सदस्य तथा पूर्वमन्त्री महेश बस्नेतले वर्तमान एमाले-कांग्रेसको गठबन्धनमा सरकार बनेसँगै जनतामा आशा र भरोसा पलाएको बताएका छन् ।

आइतबार काठमाडौँमा विकास संरक्षण तथा प्रवर्द्धन अभियानको शुभारम्भ गर्दै उनले जनताको आशाको दियोलाई वर्तमान सरकारले निभ्न दिन नहुने बताए ।

एमालेका अध्यक्ष केपी शर्मा ओलीको नेतृत्वमा सरकार बनेसँगै उद्योगी, शेयर बजार, बैंक, वित्तीय संस्था तथा अन्य व्यापार व्यवसायी उत्साही रहेको भन्दै उनले अब देशको अर्थतन्त्र सुधार हुने विश्वास रहेको बताए ।

एमाले भक्तपुर इञ्चार्जसमेत रहेका नेता बस्नेतले धराशायी बन्दै गएको देशको अर्थतन्त्रलाई वर्तमान सरकारले माथि उकास्ने बताउँदै नेपाल विद्युत् प्राधिकरणले विद्युतको लाइन काटिदिएका कारण उद्योगी पलायन हुनुपर्ने अवस्था बनेको आरोप लगाए ।

उनले उद्योगी पलायन हुने अवस्थालाई रोक्न प्रधानमन्त्रीले प्राधिकरणको निर्णयलाई उल्ट्याउँदै उद्योगीलाई उद्योग सञ्चालन गर्ने वातावरण बनाएको बताए ।