भारतको झारखण्डमा रेल दुर्घटना हुँदा दुई जनाको मृत्यु, २० घाइते
१५ साउन २०८१ १५:०१
People gather near the Howrah-Mumbai Express train that derailed near Jamshedpur in the eastern State of Jharkhand on July 30, 2024. An Indian passenger train derailed and several of its cars overturned on July 30, killing at least two people and injuring 20 others. | Photo Credit: AFP
भारतको पूर्वी राज्य झारखण्डमा मङ्गलबार रेल दुर्घटना हुँदा कम्तीमा दुई जनाको मृत्यु हुनुका साथै २० जना घाइते भएको अधिकारीहरूले बताएका छन् ।
दुर्घटना झारखण्डको राजधानी राँचीबाट करिब १२३ किलोमिटरमा रहेको पश्चिम सिंहभूम जिल्लाको चक्रधरपुरको बडाबाम्बु स्टेसन नजिकै भएको उनीहरूले बताएका छन् ।
‘बडाबाम्बु नजिकै हावडा-मुम्बई मेल एक्सप्रेसको रेलका १८ वटा डिब्बा लिकबाट खस्दा भएको दुर्घटनामा दुई जनाको मृत्यु भएको छ भने २० जना घाइते भएका छन् । एनडीआरएफको टोली घटनास्थलमा खटिरहेको छ र उद्धार कार्य जारी छ,’ दुर्घटनास्थलमा रहेका पश्चिम सिंहभूमका उपआयुक्त कुलदीप चौधरीले भने ।
अधिकारीहरूका अनुसार दुर्घटनाग्रस्त रेल हावडाबाट मुम्बईको छत्रपति शिवाजी महाराज टर्मिनसतर्फ जाँदै गरेको थियो ।
रेलवे अधिकारीहरूले राहत र उद्धार कार्यका लागि कर्मचारीसहित आवश्यक राहत र चिकित्सा उपकरण तुरुन्तै घटनास्थलमा पुर्याएको जनाएका छन् । साथै प्रभावित यात्रुलाई बसमार्फत नजिकैको रेलवे स्टेसनमा लगि बाँकी यात्राका लागि विशेष रेलको व्यवस्था गरिएको उनीहरूले बताएका छन् ।
अधिकारीहरूले रेलको लिकबाट खसेका १८ डिब्बामध्ये १६ वटामा यात्रु सवार रहेका, एउटामा पावर कार र एउटामा प्यान्ट्री कार रहेको जनाएका छन् ।
हावडा-मुम्बई मेल एक्सप्रेसको रेल लिकबाट खसेपछि छेउमा रहेको मालवाह रेलसँग ठोक्किँदा यो दुर्घटना भएको प्रारम्भिक अनुसन्धानले देखाएको छ ।
यसैबीच भारतीय रेलवेले यात्रुलाई सहयोग गर्न हेल्पलाइन नम्बरहरू पनि जारी गरेको छ ।
सम्बन्धित समाचार
प्रतिक्रिया