बागमतीका मुख्यमन्त्री जम्कट्टेलले राजीनामा दिने
६ साउन २०८१ १४:०३
अल्पमतमा परेका बागमती प्रदेशका मुख्यमन्त्री शालिकराम जम्कट्टेलले पदबाट राजीनामा दिने भएका छन् ।
यसअघि संसद फेस गर्ने निर्णय गरेका उनले नेकपा (माओवादी केन्द्र) बागमती प्रदेश संसदीय दलको सुझावपछि प्रदेशसभालाई सम्बोधन गरेर राजीनामा दिने भएका हुन् ।
आइतबार संसदीय दलको बैठकमा सांसदहरूले राजीनामा दिन सुझाव दिएका थिए ।
२५ पुस २०७९ मा एमाले, राप्रपा, माओवादी केन्द्र र एकीकृत समाजवादीको सत्ता समीकरणबाट सरकारको नेतृत्व माओवादी केन्द्रका जम्कट्टेलले गरेका थिए । उक्त सरकार साढे २ महिना मात्रै टिक्यो र एमाले सरकारबाट बाहिरियो ।
१० चैत २०७९ मा मुख्यमन्त्री जम्कट्टेलले कांग्रेस र एकीकृत समाजवादीसँगको गठबन्धन सरकारका लागि विश्वासको मत लिएर सरकार टिकाए ।
२० फागुन २०८० मा फेरि एमालेसँग माओवादीको केन्द्रीय सत्ता समीकरण बनेसँगै बागमतीमा एमाले चैत पहिलो साता सरकारमा गएको थियो । फागुनमा एमाले, माओवादी, एकीकृत समाजवादी र हाम्रो नेपाली पार्टीको सरकार गठन भएको थियो ।
बागमतीमा अब एमाले र कांग्रेसको गठबन्धन सरकार बन्नेछ ।
प्रतिक्रिया