कांग्रेसले आफूलाई नयाँ बनाउन आफूभित्रका कमजोरीहरू सुधार गर्नुपर्छ : महामन्त्री थापा

नेपाली कांग्रेसका महामन्त्री गगनकुमार थापाले कांग्रेसले आफूलाई नयाँ बनाउन आफूभित्रै रहेका कमजोरीहरू सुधार गर्न आवश्यक रहेको बताएका छन् ।

आइतबार ४२ औं बीपी स्मृति दिवसका अवसरमा नेपाली कांग्रेस केन्द्रीय पुस्तकालय शुभारम्भ कार्यक्रमलाई सम्बोधन गर्दै उनले कांग्रेसले आफूलाई नयाँ बनाउन आफूभित्रका कमजोरी पहिचान गर्नु र क्षमता खोज्नुपर्ने बताए ।

उनले भने, ‘नेपाली कांग्रेसले आफूलाई नयाँ बनाउनका लागि परपर खोज्न जाने होइन, आफैंभित्र खोज्नुपर्छ । हामीसँगै छ त्यो, हामीभित्रै छ ।’

उनले कांग्रेसभित्र पठन संस्कृति छ भन्ने कुरा पुस्तकालय उद्घाटन कार्यक्रमले पनि प्रमाणित गर्ने बताए । उनले पठन संस्कृतिको विकास गर्न आवश्यक रहेको बताए ।

उनले कांग्रेसले गर्ने बहस आम नागरिकलाई सूचित गर्ने र तथ्यमा आधारित हुनुपर्ने बताए ।

महामन्त्री थापाले कांग्रेसलाई स्रोत केन्द्रको आवश्यकता रहेको पनि बताए ।