गैंडाकोटस्थित नारायणी नदी किनारमा भेटियो दुईवटा शव
२९ असार २०८१ १८:३३
फाइल तस्बिर ।
नवलपरासी पूर्वको गैंडाकोट नगरपालिका-७, गैरेस्थित नारायणी नदी किनारमा दुईवटा शव भेटिएको छ ।
जिल्ला प्रहरी कार्यालय, नवलपरासी पूर्वका अनुसार शनिबार दिउँसो करिब साढे २ बजे नदी किनारमा दुईवटा शव भेटिएको हो ।
ती दुई शव पनि शुक्रबार नारायणगढ-मुग्लिन सडकखण्डअन्तर्गत चितवनको भरतपुर महानगरपालिका-२९, सिमलतालमा पहिरोसँगै त्रिशूलीमा खसेका बसमा सवार यात्रुहरूको हुन सक्ने आशंका गरिएको छ ।
प्रहरीका अनुसार सनाखत हुन बाँकी एउटा अन्दाजी २५/३० वर्षका र अर्का १८/२० वर्षका जस्तो देखिने पुरूषको शव भेटिएको हो । बेपत्ताको खोजीका लागि भरतपुर आएका आफन्तहरूमार्फत शवहरूको सनाखत गराइने प्रहरीले जनाएको छ ।
शनिबार बिहान गोलाघाटमा भेटिएको पुरूषको शव सनाखत भइसकेको छ ।
उनी भारत बिहारको सितामणी बर्गिनिया जमुवा बस्ने २८ वर्षीय ऋषिपल साह रहेको पुष्टि भएको हो ।
उनी काठमाडौंबाट गौर जाने क्रममा त्रिशूलीमा खसेको प्रदेश ०३-००१ ख २४९५ नम्बरको बसमा सवार रहेको उनका भाइ सतपाल साहले सनाखत गरेका हुन् ।
सम्बन्धित समाचार
प्रतिक्रिया