![Pardafas.com](https://www.pardafas.com/wp-content/uploads/2022/06/pardafas-logo.png)
लाइन जोडियो, झन् अँध्यारो भयो
![clock](https://www.pardafas.com/wp-content/themes/pardafas/assets/img/clock-icon.png)
![लाइन जोडियो, झन् अँध्यारो भयो](https://www.pardafas.com/wp-content/uploads/2023/11/no-light.jpg)
मुगु जिल्ला नेपाल विद्युत् प्राधिकरणको राष्ट्रिय प्रसारण लाइनमा जोडिए पनि दैनिक लोडसेडिङ हुँदा यहाँका नागरिकले सास्ती खेप्नु परेको छ ।
पछिल्लो पटक मुगु प्राधिकरणको राष्ट्रिय प्रसारण लाइनमा जोडिएपछि सधैँ उज्यालो होला भन्ने आशामा बसेका यहाँका बासिन्दा दैनिक जसो हुने लोडसेडिङबाट पीडित भइरहेका छन् । नियमित विद्युत् आपूर्ति हुने आशामा विद्युत्मा आधारित व्यवसाय गर्ने व्यक्ति झन् पीडित हुन थालेका छन् भने बिजुलीलाई घरायसी प्रयोग मात्र गर्ने स्थानीयको जनजीवन पनि प्रभावित हुन थालेको छ ।
छायानाथ रारा नगरपालिका–२, गमगढी बजारमा कम्प्युटर व्यवसाय गर्दै आउनुभएका सन्तोष शाहीका अनुसार पटक पटक बिजुली आउने, जाने गर्दा सेवाग्राहीलाई सास्ती हुने गरेको छ । बिजुलीको आपूर्ति नहुँदा फोटोकपी र कम्प्युटर मेसिनको काम र व्यापारमा असर परेको बताए ।
छायानाथ रारा नगरपालिका–६ का स्थानीय ज्येष्ठ नागरिक कर्णबहादुर ऐडीले बेलुकाको समयमा बिजुली छिनछिनमा आउने जाने गर्दा यहाँका ज्येष्ठ नागरिक र विद्यार्थीले प्रत्यक्ष सास्ती खेप्नुपरेको बताए । जिल्लामा राष्ट्रिय प्रसारण लाइन जोडिएदेखि दिनमा दर्जनौँ पटक बिजुली आउने र जाने गरेको उहाँले जनाउनुभयो । जिल्लामा राष्ट्रिय प्रसारण लाइन जोडिएदेखि स्थानीय गमघाट साना जलविद्युत्को उत्पादनमा जिल्लाको प्राधिकरण कार्यालयले ध्यान नदिएको आरोप स्थानीयले लगाएका छन् ।
अर्का स्थानीय खम्म बमका अनुसार प्राधिकरणको अधुरो उज्यालो अभियानले मुगुका बासिन्दाले दुःख खेप्नुपरेको छ । छिनछिनमा हुने अघोषित लोडसेडिङले आफूहरू हैरान भएको बताउँदै बेलुकाको समयमा उज्यालोका लागि वैकल्पिक उपाय दियो प्रयोग गर्नुपर्ने बाध्यता रहेको बताए । गमगाढ जलविद्युत् वितरण केन्द्रका कार्यालय प्रमुख साजन ऐडीका अनुसार बाँकेको कोहलपुरमा रहेको सबस्टेसनबाट प्रसारण लाइन विस्तार भएकाले बेलाबखत लोडसेडिङ हुने गरेको छ । साबिक कर्णाली जिल्लाका लागि सुर्खेतमा १३२ केभी विद्युत् उत्पादनको सबस्टेसन प्रसारण लाइन बन्दै गरेको छ । यो समाचार गोरखापत्र दैनिकमा छ ।
प्रतिक्रिया