कांग्रेसका १० भ्रातृ संस्थाको म्याद थप

नेपाली कांग्रेसले महाधिवेशन हुन बाँकी आफ्ना १० वटा भ्रातृ संस्थाको म्याद थप गरेको छ ।

बुधबार बूढानीलकण्ठस्थित सभापति शेरबहादुर देउवाको निवासमा बसेको केन्द्रीय कार्यसम्पादन समितिको बैठकले १० वटा भ्रातृ संस्थाको म्याद थप गर्ने निर्णय अनुमोदन गरेको हो ।

कांग्रेसले गत असार १७ गते यी भ्रातृ संस्थाको म्याद थप गर्ने निर्णय गरेको थियो ।

महाधिवेशन नगरेका भ्रातृ संघहरू नेपाल विद्यार्थी संघ, नेपाल तरूण दल, नेपाल महिला संघ, नेपाल किसान महासंघ, नेपाल दलित संघ, नेपाल लोकतान्त्रिक खेलकुद संघ, नेपाल प्रजातन्त्र सेनानी संघ, नेपाल भूतपूर्व सैनिक संघ, राष्ट्रिय लोकतान्त्रिक अपांग संघ र नेपाल थारू संघलाई महाधिवेशन गर्ने गरी म्याद थप गरिएको कांग्रेसले जनाएको छ ।

साथै बैठकले निर्देशक समितिहरूलाई २०८१ चैत्र मसान्तसम्म अनिवार्य रूपमा भ्रातृ संघको महाधिवेशन गर्न पनि निर्देशन दिएको छ ।

यी भ्रातृ संस्थाहरूको म्याद गत असार १५ गते सकिएको थियो । कांग्रेसले गत पुसमा महाधिवेशन गर्ने प्रयोजनका लागि भन्दै यी भ्रातृ संस्थाको म्याद थप गर्ने निर्णय गरेको थियो ।

नेविसंघलगायत भ्रातृ संस्था तदर्थ समितिको भरमा छ । यी भातृ संस्थाहरूको लामो समयदेखि महाधिवेशन हुन सकेको छैन ।