![Pardafas.com](https://www.pardafas.com/wp-content/uploads/2022/06/pardafas-logo.png)
सहकारी समस्या समाधानका लागि दलहरूसँग लिखित सुझाव माग्ने समितिको निर्णय
![clock](https://www.pardafas.com/wp-content/themes/pardafas/assets/img/clock-icon.png)
![सहकारी समस्या समाधानका लागि दलहरूसँग लिखित सुझाव माग्ने समितिको निर्णय](https://www.pardafas.com/wp-content/uploads/2024/06/1719750503-NAeD2.jpg)
सहकारी संस्था बचत रकम दुरूपयोग सम्बन्धमा गठित संसदीय छानबिन विशेष समितिले राष्ट्रिय मान्यताप्राप्त राजनीतिक दलहरूलाई समस्या समाधानका लागि सुझावहरू लिखित रूपमा उपलब्ध गराउन पत्राचार गर्ने निर्णय गरेको छ । मंगलबार सहकारी छानबिन विशेष समितिले राष्ट्रिय सहकारी महासंघ, बचत तथा ऋण केन्द्रीय सहकारी संघ र राष्ट्रिय सहकारी बैंक लिमिटेडका पदाधिकारीसँग सहकारी क्षेत्रसँग सम्बन्धित विषयमा लामो छलफलपछि यस्तो निर्णय गरेको हो ।
छलफलपछि सञ्चारकर्मीहरूसँग कुरा गर्दै सहकारी छानबिन समितिका संयोजक सूर्य थापाले सहकारी क्षेत्रको बचत अपचलन र ठगी तथा बचत फिर्ताको समस्या सम्बन्धमा प्रतिनिधिसभामा प्रतिनिधित्व गर्ने राष्ट्रिय मान्यताप्राप्त राजनीतिक दलहरूलाई समस्या समाधानका लागि सुझावहरू लिखित रूपमा उपलब्ध गराउन पत्राचार गर्ने निर्णय गरेको बताए । उनले सहकारी समस्यालाई जस्ताको तस्तै बुझ्न, तथ्य प्राप्त गर्न समस्याको प्रवृत्ति विश्लेषण गरी समाधान गर्ने गरी कोसिस जारी रहेको बताए ।
उनले सहकारी समस्या आर्थिक क्षेत्रको समस्या मात्रै नभएर तीनखम्बे अर्थतन्त्रको एउटा खम्बा भएको बताए । उनले सहकारी क्षेत्रको विकास, प्रवर्द्धन र विस्तारसँग राजनीतिक क्षेत्र पनि अभिन्न रूपले जोडिएको भन्दै प्रतिनिधिसभाले अधिकार दिएको चारबुँदे कार्यदेशमा केन्द्रित भएर सहकारी क्षेत्रका समस्या समाधानका निम्ति राजनीतिक दलहरूसँग सुझाव माग गरिने बताए ।
उनले संगठित रूपमा सहकारी क्षेत्रको विकास, प्रवर्द्दन र व्यवस्थापनमा राजनीतिक दलहरू जिम्मेवार रहेको बताए । उनले राजनीतिक दलका विभिन्न व्यक्तिहरू संग्लन रहेको भन्दै शुद्धीकरण र समस्या समाधानका लागि राजनीतिक क्षेत्रले जवाफदेही ढंगले छानबिन अभियानमा साथ दिन आवश्यक रहेको बताए ।
सहकारी छानबिन समितिको छलफलमा सहकारी क्षेत्रका जानकारहरूले सहकारी क्षेत्रमा अहिले देखापरेका संकट र सहकारी क्षेत्रका समस्या समाधान गर्ने बारेमा महत्त्वपूर्ण सुझावहरू दिएका छन् ।
प्रतिक्रिया