शैक्षिक प्रमाणपत्र नक्कली आरोपमा भरतपुर क्यान्सर अस्पतालका असिस्टेन्टविरूद्ध मुद्दा

अख्तियार दुरूपयोग अनुसन्धान आयोगले शैक्षिक योग्यताको प्रमाणपत्र नक्कली रहेको आरोपमा चितवनको भरतपुरस्थित बीपी कोइराला मेमोरियल क्यान्सर अस्पतालका असिस्टेन्टविरूद्ध विशेष अदालतमा मुद्दा दर्ता गरेको छ ।

कर्मचारी सुकबहादुर तामाङले अस्पतालको प्रशासनतर्फ जुनियर असिस्टेन्ट पदमा कार्यरत रहँदा असिस्टेन्ट पदमा बढुवाका लागि पेस गरेको शैक्षिक योग्यताको प्रमाणपत्र नक्कली रहेको दाबी गर्दै अख्तियारले आइतबार उनीविरूद्ध मुद्दा हालेको हो । तामाङले काठमाडौंको रामशाहपथस्थित पद्मोदय माध्यामिक विद्यालयबाट एसएलसी उत्तीर्ण गरेको प्रमाणपत्र पेस गरेका थिए ।

उनको शैक्षिक योग्यताको प्रमाणपत्र नक्कली रहेको भन्दै परेको उजुरीमाथि छानबिन गरेर अख्तियारले उनको कार्यलाई भ्रष्टाचारजन्य कसुर ठहर गरेको छ । तामाङले सोही प्रमाणपत्रका आधारमा बढुवा भएर ओहदा, लाभ र सेवासमेत प्राप्त गरेका थिए ।

उनलाई भ्रष्टाचार निवारण ऐन, २०५९ को दफा १६ को उपदफा (१) बमोजिम कैद र जरिवाना सजायको मागदाबी लिएर मुद्दा दर्ता गरिएको छ ।