भक्तपुरमा सञ्चालित हेलिप्याडले सुरक्षा चिन्ता
१२ असार २०८१ १८:१४
त्रिभुवन अन्तर्राष्ट्रिय विमानस्थलको हवाई उडान चाप व्यवस्थापन गर्ने उद्देश्यले भक्तपुरको नलिञ्चोकमा निर्माण गरिएको हेलिप्याड व्यावसायिक रूपमा सञ्चालनमा आएको छ । तर, उक्त हेलिप्याड आवश्यक पूर्वाधार निर्माण नगरी सञ्चालन गर्दा सुरक्षा जोखिम बढेको छ ।
सूर्यविनायक नगरपालिका-१० स्थित नलिञ्चोकमा ३३ रोपनी क्षेत्रफलमा हेलिप्याड निर्माण गरिएको हो । तर, हेलिप्याडका विद्यमान समस्या समाधान हुनुको साटो समस्या थपिएको छ । अहिले हेलिप्याड भनेको हेलिकप्टरका लागि पक्की अवतरण क्षेत्र मात्र हो भन्ने ठानिएको छ । त्यहीअनुसार संरचना बनाइएको छ ।
उक्त हेलिप्याडमा हेलिपोर्टका सबै आवश्यक सुविधाहरू छैनन् । यसमा कन्ट्रोल टावर वा टर्मिनल भवन पनि छैन । यसबाहेक टर्मिनल भवनको अभावमा यात्रुहरूलाई आरामसँग पर्खन, चेक इन गर्न वा अत्यावश्यक सेवाहरू पहुँच गर्न कुनै सुविधा छैन ।
हेलिपोर्टमा धेरै महत्त्वपूर्ण सुविधाहरूको अभाव छ । सबैभन्दा उल्लेखनीय भनेको इन्धन भर्ने सुविधाको अभाव हो । साइटमा हेलिकप्टरहरू इन्धन भर्न सक्ने क्षमताबिना सञ्चालनमा असर पर्नेछ । यसले सुरक्षा चिन्तालाई पनि बढाएको छ ।
हेलिप्याडमा सुरक्षा र निगरानी जस्ता अन्य आधारभूत आवश्यकताहरुको पूर्वतयारी छैन । पर्याप्त सुरक्षा व्यवस्था नहुनु प्रमुख चिन्ताको विषय हो । उचित सुरक्षा प्रोटोकल र पूर्वाधारबिना हेलिप्याड अनधिकृत पहुँच र सम्भावित सुरक्षा खतराको जोखिममा छ ।
हेलिप्याड क्षेत्रमा धेरै अवरोधहरू पनि देखिएका छन् । दक्षिण-पूर्वमा प्रसारण लाइनहरू, पूर्वमा रूखहरू, टेलिकम टावरहरू र पश्चिममा अग्लो भवनहरूले उडानमा असर पर्ने देखिएको हो ।
तर, अन्तर्राष्ट्रिय विमानस्थल साँघुरो भइरहेको र जहाज तथा हेलिकोप्टरको संख्या पनि बढिरहेको सन्दर्भमा यो हेलिप्याड सान्दर्भिक भएको सरकारको भनाइ छ । नेपाल नागरिक उड्डयन प्राधिकरणले निर्माण गरेको यो हेलिप्याड विशेषगरी पूर्वी भेगका जिल्लाका लागि उपयुक्त हुने दाबी गरिएको छ ।
हेलिप्याडमा १७ वटा हेलिकोप्टर पाकिङ गर्न मिल्ने क्षमता छ । साथै एकै पटक चारवटा हेलिकप्टर अवतरण गराउन सकिन्छ । करिब ११ करोड रूपैयाँको लागतमा हेलिप्याड निर्माण सम्पन्न भएको उड्डयन प्राधिकरणले जनाएको छ । प्राधिकरणका अनुसार हाल मुलुकमा १२ हेलिकोप्टर सेवाप्रदायक कम्पनीका ४० हाराहारी हेलिकोप्टर छन् ।
सम्बन्धित समाचार
प्रतिक्रिया