कैलालीमा चट्याङ लागेर दुई जनाको मृत्यु, ६ घाइते
१२ असार २०८१ १२:४३
फाइल तस्बिर ।
कैलालीमा चट्याङबाट दुई जनाको मृत्यु भएको छ । जोशीपुर गाउँपालिका-३, भितरियाका ३१ वर्षीय जयराम डगौरा र धनगढी उपमहानगरपालिका-१८, एफ गाउँका २७ वर्षीय शालिम चौधरीको चट्याङबाट मृत्यु भएको जिल्ला प्रहरी कार्यालयका प्रहरी नायब उपरीक्षक कविन्दसिंह बोहराले जानकारी दिए ।
उनका अनुसार डगौराको खेतमा आली बनाउने क्रममा चट्याङ लागेर घाइते भई उपचारका क्रममा महापार्वती क्लिनिकमा मृत्यु भएको हो भने चौधरीको खेतमा रोपाइँ गर्ने क्रममा चट्याङ लागेर घाइते भई सेती प्रादेशिक अस्पताल धनगढीमा उपचारकै क्रममा मृत्यु भएको हो ।
त्यस्तै घाइते हुनेमा जानकी गाउँपालिका-४, बेलपुरकी २९ वर्षीया रीता कठरिया, सोही ठाउँकी २३ वर्षीया सुष्मा डगौरा, भजनी नगरपालिका-६ का ५५ वर्षीय रामबहादुर चौधरी, घोडाघोडी नगरपालिका-९, बुदेनीकी ९ वर्षीया सरस्वती भुल, सोही ठाउँकी ७ वर्षीया पारू कठायत र १० वर्षीया खिमा कठायत रहेका छन् ।
यसैबीच लमजुङको क्व्होलासोथार गाउँपालिका-७, तल्लो केम्लीगाउँमा चट्याङ लागेर एक जनाको मृत्यु भएको छ । गएराति शौचालय जान बाहिर निस्कने क्रममा ६५ वर्षीय दानबहादुर घर्तीको चट्याङ लागेर मृत्यु भएको जिल्ला प्रहरी कार्यालय, लमजुङका प्रहरी निरीक्षक मेघनाथ चापागाईंले जानकारी दिए ।
चट्याङका कारण राइनास नगरपालिका-९, ढाड कलाउँचेका ३८ वर्षीय रामचन्द्र अधिकारी घाइते भएका छन् । प्रहरी निरीक्षक चापागाईंका अनुसार उनको सुन्दरबजारस्थित नमुना अस्पतालमा उपचार भइरहेको छ । चट्याङका कारण बेँसीशहर नगरपालिका-६, शेराका स्थानीय मदन परियारको एउटा गोरू पनि मरेको प्रहरीले जनाएको छ ।
सम्बन्धित समाचार
प्रतिक्रिया