अहिले प्रहरी महानिरीक्षक परिवर्तन हुँदैनन्ः प्रधानमन्त्री

प्रधानमन्त्री पुष्पकमल दाहाल ‘प्रचण्ड’ले प्रहरी महानिरीक्षकको सन्दर्भमा हाल कुनै परिवर्तन नहुने बताएका छन् । आज भरतपुर विमानस्थलमा पत्रकारहरुसँग कुराकानी गर्दै उनले यस्तो बताएका हुन् ।

उनले भने, ‘मैले अस्तिको दिन मात्रै तीनैजना आईजीपीहरुलाई बोलाएर केही परिवर्तन हुँदैन तपाईहरु ढुक्कसँग काम गर्नुस् भनिसकेको छु । त्यही गतिमा उहाँहरुले काम गर्नुभएको छ । यो हल्ला मात्रै हो ।’

उनले सरकारले ल्याएको नीति कार्यक्रम तथा बजेट जनता र राष्ट्रको पक्षमा रहेको बताए । बजेट समग्रमा सन्तोषजनक रहेको उनको भनाइ छ । ‘मलाई लाग्छ यो प्रतिनिधिसभाबाट पारित हुन्छ,’ उनले भने ।

सुशासन, न्याय र सामाजिक समृद्धिको क्षेत्रमा पनि थुप्रै सकारात्मक पहल भएको उनको भनाइ छ । ‘यो सन्तोषजनक छ । राष्ट्र र जनताको अपेक्षा अनुसार अझै गति दिनुपर्छ भन्ने आवश्यकता म ठान्छु,’ उनले भने ।