जनमतको नेतृत्वमा मधेश प्रदेश, सिंह बने मुख्यमन्त्री

सत्ता समीकरणको सहमतिअनुसार जनमत पार्टीका सांसद सतिश सिंह मधेश प्रदेशको मुख्यमन्त्री नियुक्त भएका छन् । प्रदेश प्रमुख सुमित्रा सुवेदी भण्डारीले सिंहलाई शुक्रबार मुख्यमन्त्री नियुक्त गरेकी हुन् ।

संविधानको धारा १६८ को उपधारा २ बमोजिम सिंह मुख्यमन्त्री नियुक्त भएका हुन् । सिंहले जनमतका साथै नेकपा एमाले, माओवादी केन्द्र, एकीकृत समाजवादी, नागरिक उन्मुक्ति पार्टी र नेपाल संघीय समाजवादीका सांसदको समर्थनमा मुख्यमन्त्रीमा दाबी पेस गरेका थिए ।

सिंह सप्तरी क्षेत्र नम्बर २ को (१) बाट निर्वाचित भएका हुन् । उनीसँगै सप्तरीबाटै जनमतको समानुपातिक सांसद रहेकी रन्जुकुमारी मण्डल खंगलाई तत्काल बिनाविभागीय राज्यमन्त्री बनाउने तयारी भएको जनमत पार्टीका नेता बिपी साहले बताए ।

जसपा नेपालका मुख्यमन्त्री सरोजकुमार यादवले बुधबार प्रदेश सभामा विश्वासको मत गुमाएर पद मुक्त हुँदा प्रदेश प्रमुखले त्यही दिन नयाँ सरकार गठनका लागि बहुमतसहित दाबी पेस गर्न आज (शुक्रबार) सम्मको समय दिएकी थिइन् ।

नवनियुक्त मुख्यमन्त्री सिंहले आजै शपथ लिनेछन् ।