भारतीय प्रधानमन्त्री मोदीको राजीनामा
२३ जेठ २०८१ १४:५६
भारतीय प्रधानमन्त्री नरेन्द्र मोदीले राजीनामा दिएका छन् । उनले आज राष्ट्रपति भवन पुगेर भारतीय राष्ट्रपति द्रौपदी मुर्मुलाई मन्त्रिपरिषद्कै राजीनामा बुझाएका हुन् ।
राष्ट्रपति मुर्मुले राजीनामा स्वीकृत गरेको राष्ट्रपतिको कार्यालयले जनाएको छ । साथै अर्को सरकार नबनेसम्म अब मोदी नेतृत्वको सरकार कामचलाउ बनेको छ । भारतमा नयाँ प्रधानमन्त्रीको सपथ ८ जुनमा हुने सम्भावना छ ।
हालै सम्पन्न भारतीय लोकसभा निर्वाचन–२०२४ को अन्तिम मतपरिणामअनुसार सबैभन्दा ठूलो पार्टी भाजपाबाट नरेन्द्र मोदी नै प्रधानमन्त्री बन्ने निश्चितप्रायः छ । भाजपासहितको गठबन्धन एनडीएले बहुमत प्राप्त गरेको छ ।
मतपरिणामअनुसार कुल ५४३ सिटमा भएको निर्वाचनमा सत्तारूढ भारतीय जनता पार्टी (भाजपा) २४० सीटमा विजयी भएको छ । उसले गएको चुनावको तुलनामा ६३ सीट गुमाएको हो ।
प्रमुख प्रतिपक्षी दल भारतीय राष्ट्रिय कांग्रेस (आईएनसी) ले ९९ सीटमा जित हात पारेको छ । उसले गएको चुनावको तुलनामा ४७ सीट बढी पाएको हो ।
यसैगरी समाजवादी पार्टीले ३७ सीट, आल इण्डिया तृणमूल कांग्रेस– एआईटीसी २९, द्रविड मुन्नेत्र कजगमले २२ सीट तथा तेलुगु देसामले १६ र जनता दल (एकीकृत)ले १२ सीट जितेको छ ।
सम्बन्धित समाचार
प्रतिक्रिया