मन्त्रिपरिषद्ले स्वीकृति दिइसकेपछि बालेनले किन गरे सिंगापुर भ्रमण रद्ध ?

सिंगापुर जान अनुमति मागेपछि नजाने निर्णय गरेका उनले तर त्यसबारे संघीय सरकारलाई जानकारी दिएका थिएनन्।  साहले सिंगापुर जाने कार्यक्रम रद्ध भएको जानकारी नदिँदा मन्त्रिपरिषद्ले शुक्रबार निर्णय गरेको थियो ।

बालेनको भ्रमणबारे संघीय मामिला तथा सामान्य प्रशासन मन्त्रालयले लगेको प्रस्ताव मन्त्रिपरिषद्ले स्वीकृत गरेको जानकारी शुक्रबार सरकारकी प्रवक्ता एवम् सूचना, प्रविधि तथा सञ्चारमन्त्री रेखा शर्माले दिएकी थिइन् ।

काठमाडौं महानगरपालिकाका सहायक प्रवक्ता दीपक अधिकारीले मेयर साह नजाने भएपछि अब उक्त समिटमा काठमाडौं महानगरपालिकाको सहभागिता नरहने बताए ।

‘केही समयअघि नै भ्रमण अनुमतिका लागि पत्र लेखिएको हो’, अधिकारीले भने, ‘तर बीचमा  नजाने निर्णय भएको थियो । त्यसबारे जानकारी गराउन नपाएकाले संघीय सरकारबाट निर्णय भएर आएछ। सिंगापुर जाने मेयरको कार्यक्रम यसअघि नै रद्ध भइसकेको छ ।’