दुर्गा प्रसाईका कार्यकर्ताद्वारा दुईवटा बैंकका शाखामा तोडफोड
२७ वैशाख २०८१ १९:४२
दुर्गा प्रसाईंका कार्यकर्ताहरूले झापाको बिर्तामोडमा बिहीबार दुईवटा बैंकका शाखा कार्यालयमा तोडफोड गरेका छन् ।
‘राष्ट्र राष्ट्रियता धर्म संस्कृति र नागरिक बचाऊ अभियान’अन्तर्गत बिर्तामोडमा आयोजित र्यालीमा सहभागी करिब १५ जनाको समूहले ती दुई बैंकको शाखा कार्यालयमा ढुंगामुढा गरेर तोडफोड गरेका हुन् ।
बिर्तामोडमा बिहीबार उक्त अभियानको युवा संगठन नागरिक युवा दस्ताले जुलुस निकालेको थियो ।
बिर्तामोड नगरपालिका-५ सिटी सेन्टरबाट निकालिएको र्याली मुक्ति चोकतिर जाँदै गर्दा ज्योति विकास बैंक र एभरेस्ट बैंकको शाखा कार्यालयमा तोडफोड गरिएको हो ।
प्रसाईं कार्यकर्तालाई बैंकको शाखा कार्यालयको शिशा फुटाउँदै गरेको अवस्थामा प्रहरीले पक्राउ गरेको छ ।
पक्राउ पर्नेमा बिर्तामोड ३ का मनकुमार तामाङ, बिर्तामोड ५ का बुलेट भन्ने अञ्जेश राई, बुद्धशान्ति गाउँपालिकाका दिपेश राई र बिर्तामोड ४ का पवन दुलाल रहेका छन् ।
दुर्गा प्रसाईंले नेपाली जनतालाई शोषणविरुद्ध भन्दै लामो समयदेखि बैंकहरूविरुद्ध आन्दोलन गरिरहेका छन् ।
यही वैशाख २५ गते एभरेष्ट बैंक र ज्योति विकास बैंकले मानसिक यातना दिएको भन्दै बर्दियाको राजापुरका खुशीराम चौधरी आत्महत्या गरेका थिए ।
उक्त घटनाको विरोधमा उत्रिएका प्रसाईंका कार्यकर्ताहरू बिर्तामोडका शाखामा खनिएका हुन् । करिब डेढ सयको उपस्थितिमा कालो मास्क र नेपालको झण्डासहित विरोध प्रदर्शनमा उत्रिएकामध्ये केही बैंकका शाखामाथि जाइलागेका हुन् ।
प्रदर्शनकारीहरू ज्योति बिकास बैंकमा प्रवेश गर्न खोजेपछि प्रहरीले रोकेको थियो। उनीहरुले एभरेष्टको शाखा रहेको घरमा ढुंगा प्रहार गर्दा १५/१६ वटा शिशा फुटेको इलाका प्रहरी कार्यालय बिर्तामोडले जनाएको छ।
प्रतिक्रिया