भैंसीपाटीस्थित सीजी फुड्स पार्कमा आक्रमण, २२ जना पक्राउ
२१ वैशाख २०८१ २०:१३
चौधरी ग्रुपद्वारा सञ्चालित ललितपुरको भैंसेपाटीस्थित सीजी फुड्स पार्कका एउटा समूहले आक्रमण गरेको छ ।
शुक्रबार दिउँसो ३ बजेको समयमा बा ४ ख १०८५ नम्बरको बसमा आएको एक समूहले सीजी फुड्स पार्कमा कार्यरत कर्मचारीलाई हातपात गरेको प्रवक्ता मधुसूदन पौड्यालले बताए ।
उक्त समूहले सीजी फुड्स पार्कको कार्यालय तोडफोड गरेको छ । उनीहरूले केही कर्मचारीलाई हातपात पनि गरेको पौड्यालले बताए ।
फुड्स पार्कमा प्रवेश गर्नेबित्तिकै सरकारविरुद्ध नाराबाजी गरेका उनीहरूले चौधरी ग्रुपका व्यवस्थापकलाई पनि अभद्र व्यवहार गरेको उक्त कम्पनीले जनाएको छ ।
‘त्यहाँ कार्यरत महिला कर्मचारीलाईसमेत हातपात हुन थालेपछि फुड्स पार्कमा कार्यरत उनीहरू प्रतिकारमा उत्रिए। जसकारण आक्रमणकारीहरू पछि हटे,’ पौडेलले भनेका छन्, ‘घटनापछि आएको प्रहरीले आक्रमणमा संलग्नहरूलाई पक्राउ गरेको जानकारी आएको छ।’
घटनाबारे चौधरी ग्रुपले निन्दा गरेको छ । पौड्यालले विज्ञप्ति निकालेर दिनदहाडै भएको आक्रमणपछि कानुनी कारबाहीका लागि सरकारसँग आग्रह गरेका छन् ।
उक्त घटनापछि प्रहरीले आक्रमण संलग्न भनिएका १७ जना महिला र ५ जना पुरुषसहित २२ जनालाई नियन्त्रणमा लिइएको जनाएको छ। जसमा बसका चालक र सहचालक पनि छन् ।
पक्राउ परेका सबैजनालाई ललितपुर प्रहरी परिसरमा राखिएको एसपी नरेशराज सुवेदीले जानकारी दिए ।
प्रतिक्रिया