एनसिबी कन्फरेन्समा सहभागी भई स्वदेश फर्के आईजीपी कुँवर
१९ वैशाख २०८१ १२:२५
प्रहरी महानिरीक्षक बसन्तबहादुर कुँवर इन्टरपोल महासचिवालयको आयोजनामा फ्रान्सको लियोनमा वैशाख ११ देखि १३ सम्म सञ्चालन भएको ‘१९औं हेड अफ एनसिबी कन्फरेन्स’मा नेपालको तर्फबाट सहभागी भई बुधबार स्वदेश फर्किएका छन् ।
हेड अफ एनसिबी कन्फरेन्समा मुख्य रूपमा अन्तर्राष्ट्रिय स्तरमा हुने अपराधहरूको नियन्त्रण सम्बन्धमा इन्टरपोलका सम्पूर्ण १९६ सदस्य राष्ट्रहरूका एनसीबी प्रमुखहरू, इन्टरपोल महासचिव तथा पदाधिकारीबीच समन्वय एवम् सहकार्यका विषयहरूमा छलफल भएको थियो ।
साथै सदस्य राष्ट्रहरूबीच अपराधीको विवरण आदानप्रदान, बालबालिकाको सुरक्षा, तथ्यांक सुरक्षाका एजेन्डामा छलफल तथा सहमति भएको थियो ।
एनसिबी नेपालका प्रमुखसमेत रहेका प्रहरी महानिरीक्षक कुँवरले आपराधिक घटनाको सूचना आदान प्रदान, अपराध अनुसन्धानको विषय तथा सम्बद्ध प्रहरी कर्मचारीको क्षमता वृद्धि एवम् पारस्परिक सहयोग आदान प्रदानका विषयहरूमा मित्रराष्ट्रहरू भारत, चीन र मलेसियाका प्रतिनिधिहरूसँग द्विपक्षीय छलफल समेत गरेका थिए ।
प्रहरी महानिरीक्षक कुँवर कन्फरेन्समा सहभागी हुन वैशाख १० मा त्यसतर्फ प्रस्थान गरेका थिए । कन्फरेन्समा प्रहरी उपरीक्षक रविन्द्र बहादुर सिंह पनि सहभागी थिए ।
प्रतिक्रिया