नेपालमा चाँडोभन्दा चाँडो आइटी हबको विकास गर्न जरुरी : मन्त्री शर्मा

सञ्चार तथा सूचना प्रविधिमन्त्री रेखा शर्मा नेपालमा चाँडोभन्दा चाँडो आइटी हबको विकास गर्न जरुरी रहेको बताएकी छन् ।

सोमबार लगानी सम्मेलनमा बोल्दै मन्त्री शर्माले नेपालमा बढ्दै गइरहेको सूचना प्रविधि सम्बन्धी सेवा निर्यातलाई प्रवर्द्धन गर्न सूचना प्रविधि उद्योग र स्टार्टअपहरुलाई एकै थलोबाट सञ्चालन गर्न आवश्यक पूर्वाधारको अभाव रहेको बताइन् । उनले सो अभावलाई परिपूर्ति गर्नका लागि चाँडोभन्दा चाँडो आइटी हबको विकास गर्न जरुरी रहेको बताइन् । उनले आइटी हबको विकास गर्नाले देशभित्र र बाहिरका लगानीकर्ताको पुँजी तथा सूचना प्रविधि क्षेत्रका दक्ष जनशक्तिको ज्ञान, सीप र श्रमको एकीकृत परिचालन गर्ने वातावरण बन्ने विश्वास व्यक्त गरिन् । उनले सूचना प्रविधि उद्योगको प्रवर्द्धनका लागि देश भित्र र बाहिरका साना तथा ठुला सबै लगानीकर्तासँग सहकार्य गर्न सरकार तयार रहेको स्पष्ट पारिन् ।