तिलोत्तमा एक्स्ट्राटेक लिजेन्ड कप क्रिकेटको उपाधि सन् २०१४ वर्ल्ड कप लिजेन्ड्सलाई

सन् २०१४ वर्ल्डकप लिजेन्डले तिलोत्तमा एक्स्ट्राटेक लिजेन्ड कप क्रिकेटको उपाधि जितेको छ। तिलोत्तमा नगरपालिकामा नीजि क्षेत्रको पहलमा बनेको एक्स्ट्राटेक ओभल क्रिकेट रंगशालाको उद्घाटन अवसरमा सोमबार एकदिने उक्त प्रतियोगिता भएको हो।

चार टोलीले प्रतिष्पर्धा गरेको प्रतियोगिताको फाइनलमा सन् २०१४ वर्ल्ड लिजेन्डले रेस्ट अफ नेपाललाई १७ रनले हराउँदै उपाधि जित्यो। सन् २०१४ वल्र्ड कप लिजेन्डको कप्तानी पारस खड्का र रेस्ट अफ नेपालको कप्तानी विनोद दासले गरेका थिए।

दुवै नेपाली क्रिकेट टोलीका आ–आफ्ना समयका कप्तान हुन्। एक्स्ट्राटेक ओभल क्रिकेट रंगशालाको उद्घाटन अवसरमा सोमवार पूर्वकप्तानद्वय फाइनलमा एकअर्काको प्रतिद्वन्द्वी पाएका हुन्।

१० ओभरको खेलमा सन् २०१४ वर्ल्ड कप लिजेन्डले १०२ रनको विशाल लक्ष्य दियो। जवाफी ब्याटिङ गरेको रेस्ट अफ नेपालले निर्धारित ओभरमा ९ विकेट गुमाउँदै ८४ रन मात्र बनाउन सक्यो। रेस्ट अफ नेपालका लाक्पा लामाले २० रन जोड्दा उनिल श्रेष्ठले १८ रन र सीता रानामगरले १२ रनको योगदान दिए।

अन्य ब्याटर सस्तै आउट भएपछि रेस्ट अफ नेपालले लक्ष्य भेटाउन सकेन। सन् २०१४ वर्ल्ड कप लिजेन्डको बलिङमा सामसङ जंग थापाले दुई ओभरमा चार विकेट लिए। शक्ति गौचन र बद्री पंगेनीको नाममा समान दुई विकेट रह्यो।

त्यसअघि टस जितेर पहिले ब्याटिङ गरेको सन् २०१४ वर्ल्ड कप लिजेन्ड्सले निर्धारित ओभरमा सात विकेट गुमाएर १०१ रनको योगफल बनायो। २०१४ वर्ल्ड कप लिजेन्डका कप्तान पारस खड्काले १२ बलमा ३९ रन जोडे। ओपनर वीरेन्द्र शाहले २९ रन र प्रफुल्ल वैद्यले १३ रनको योगदान दिए।

रेस्ट नेपालका लाक्पा लामाले चार विकेट लिँदै अलराउन्ड प्रदर्शन गरे पनि आफ्नो टोलीलाई जित दिलाउन सकेनन्। राजकुमार प्रधान र दीपेन्द्र चौधरीको नाममा समान एक विकेट रह्यो। त्यस अघिका खेलमा रेस्ट अफ नेपालले रुपन्देही लिजेन्ड्सलाई १६ रन र सन् २०१४ वर्ल्ड कप लिजेन्ड्सले १९९६ लिजेन्ड्सलाई पाँच विकेटले हराउँदै उपाधि भिडन्त तय गरेका हुन्।

त्यसअघि प्रतियोगिताको लुम्बिनी प्रदेश प्रमुख अमिक शेरचनले एक्स्ट्राटेक ओभल क्रिकेट रंगशालाको उद्घाटन गरेका थिए। उक्त रंगशाला गुल्मीका विनोद कुँवरको निजी लगानीमा बनेको हो।

प्रदेश प्रमुख शेरचनले ब्याटिङ र कुँवरले बलिङ गरी सो मैदानको शुभारम्भ गरेका थिए। गत ३० जेठमा रंगशाला निर्माणको शिलान्यास भएको थियो। आठ महिनापछि रंगशालाको मैदानको निर्माण कार्य सम्पन्न भएको हो। तिलोत्तमा नगरपालिका वडा १७ मा ४० करोड रुपैयाँभन्दा बढी लगानीमा एक्स्ट्राटेक ओभल रंगशालाको निर्माण गरिएको हो।