आर्थिक अराजकता फैलाउने बिरुद्ध कडा कारबाही गर्न प्रधानमन्त्रीको निर्देशन, सरकार दुर्गा प्रसाईँ पक्राउ गर्ने तयारीमा हाे?

प्रधानमन्त्री पुष्पकमल दाहाल प्रचण्डले नवगठित मन्त्रिपरिषद्को पहिलो बैठकमा बैंकको ऋण नर्तिन भड्काउँदै हिँड्नेहरूलाई नियन्त्रणमा लिएर कारबाही गर्न सम्बद्ध मन्त्रालय र निकायलाई निर्देशन दिएका छन् । उनको संकेत अभियन्ता दुर्गा प्रसाईँ तर्फ थियो ।

नवनियुक्त अर्थमन्त्री वर्षमान पुनले वित्तिय क्षेत्रका ब्यक्तित्वहरुसँगको भेटमा प्रधानमन्त्रीले मन्त्रिपरिषद् बैठकमा दिएको निर्देशनका विषयमा जानकारी गराएका हुन् ।

प्रसाईँ पछिल्लो समय बैंकको ऋण नर्तिन तथा बैंक, व्यापारी र उद्योगीहरु बिरुद्ध आपत्तिजनक सार्वजनिक अभिब्यक्ति दिँदै आएका ब्यक्ति हुन् । उनले यसलाई अभियान नै बनाएर अघि बढाएकाे निजी क्षेत्रकाे भनाइपछि पहिलो पटक सरकारले उनी बिरुद्ध कारबाहीको संकेत गरेको हो ।

यस्तै नवनियुक्त अर्थमन्त्री वर्षमान पुन अनन्तले बैंक तथा वित्तीय संस्थाबाट लिएको ऋण नर्तिन अभियान सञ्चालन गर्ने प्रवृत्तिलाई सरकारले निरुत्साहित गर्न हरसम्भव प्रयासगर्ने बताए । उनले यस्ताे गर्नेलाई कडा कारबाही हुने समेत बताए ।

बिहीबार सिंहदरबारस्थित मन्त्रालयमा पुगेका नेपाल बैंकर्स संघका प्रतिनिधिहरूसँग कुरा गर्दै मन्त्री पुनले जनताको निक्षेपबाट लिइएको बैंकको ऋण तिर्दिन भन्ने र तिर्नुहुन्न भन्ने प्रवृत्तिलाई सरकारले कडाइका साथ नियन्त्रण गर्ने बताए।

बिहीबार बसेको मन्त्रिपरिषद् बैठकमा प्रधानमन्त्री पुष्पकमल दाहाल प्रचण्डले बैंकको ऋण नर्तिन भड्काउँदै हिँड्नेहरूलाई नियन्त्रणमा लिएर कारबाही गर्न सम्बद्ध मन्त्रालय र निकायलाई निर्देशन दिएकोसमेत उनले जानकारी दिए।

‘बैंक तथा वित्तीय संस्थाबाट लिएको ऋण तिर्दिन भन्ने र तिर्नुहुन्न भनेर अभियान चलाउने प्रवृत्तिलाई अब धेरै दिन छुट दिन सकिँदैन,’ पुनले भने, ‘त्यो प्रवृत्तिलाई प्रोत्साहित गर्ने काम कसैले पनि गर्नुहुँदैन।’

निजी क्षेत्रको मनोबल घटाउने प्रवृत्तिले अर्थतन्त्र र मुलुकको समग्र समृद्धिको यात्रालाई अवरुद्ध पार्ने भएकाले सरकारले लगानीकर्ताको मनोबल गिर्न नदिने प्रतिबद्धता मन्त्री पुनको थियो। मुलुकमा लगानीको वातावरण र लगानी सुरक्षाको ग्यारेन्टी गर्न सकिए मात्र बाह्य लगानी आकर्षित गर्न सकिनेमा सरकार स्पष्ट रहेको पुनले उल्लेख गरे।

‘सरकारले लगानीको वातावरण बनाउँछ। सुरक्षाको प्रत्याभूति दिलाउँछ,’ पुनले भने, ‘निजी क्षेत्र आत्तिने र डराउने वातावरणको सरकारले अन्त्य गर्छ।’