वीरगन्जमा झडपपछि अनिश्चितकालीन कर्फ्यू

जिल्ला प्रशासन कार्यालय पर्साले वीरगञ्ज महानगरपालिकाका केही स्थानमा कर्फ्यू आदेश जारी गरेको छ ।

बिहीबार रौतहटको इशनाथ नगरपालिकाको मोतिपुरमा दुुई पक्षबीच विवाद र झडप भएको विषयलाई लिएर आज वीरगन्जमा भएको विरोध जुलुसको क्रममा विवाद र झडप भएको थियो । त्यसपछि प्रशासनले आज सोमबार बेलुकी ५ बजेदेखि कर्फ्यू आदेश जारी गरेको हो ।

प्रशासनले वीरगन्ज महानगरमा पूर्वमा नगवा चौक (बारा जिल्ला सिमाना), पश्चिममा तिलावे पुल, उत्तरमा परवानीपुर पर्सा र दक्षिणमा मितेरी पुल (भन्सार क्षेत्र) सम्म कर्फ्यू आदेश जारी गरेको छ । रौतहटको इशनाथमा मूर्ति विसर्जन गर्ने क्रममा स्थानीय दुई पक्षबीच झडप भएको थियो ।