न्यायाधीश मरासेनीको निधनमा आज शोक बिदा

उच्च अदालत पाटनले न्यायाधीश मातृकाप्रसाद मरासेनीको निधनमा आज(बुधबार) शोक बिदा दिने निर्णय गरेको छ।

आज उच्च अदालत पाटन, हेटौँडा इजलास र मातहतका सम्पूर्ण जिल्ला अदालतमा शोक बिदा दिने निर्णय गरेको अदालतका प्रवक्ता तीर्थराज भट्टराईले जानकारी दिए।

उच्च अदालत पाटनका न्यायाधीश मरासेनीको मङ्गलबार हृदयघातका कारण ५६ वर्षको उमेरमा निधन भएको थियो।

ह्दयघात भएपछि उनलाई उपचारका लागि कलङकीस्थित नेपाल नेशनल अस्पताल पुर्याइएको थियो। जहाँ उपचारका क्रममा उनको निधन भएको थियो।

उनको हिजो साँझ पशुपति आर्यघाटमा अन्त्येष्टि गरिएको छ।