मैले सुरूदेखि नै निष्ठाका साथ राजनीति गरिरहेको छु : अध्यक्ष ओली

नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले आफूले सुरूदेखि नै निष्ठाका साथ राजनीति गरेको बताएका छन्।

आफ्नो अभिव्यक्तिमा अन्कन्ट्रोल मिसाईल प्रहार भएपनि ठिक ठाउँमा ताकेर हान्ने गरेको ओलीको भनाई थियो। ओलीले संसद वा बाहिर कुनै पनि ठाउँमा आफूले दिएको अभिव्यक्ति देश र जनताप्रतिका समर्पणभावमा केन्द्रित रहेको बताए।

मंगलबार काठमाडौंमा अयोजित ‘संसदमा केपी शर्मा ओली’ नामक पुस्तक लोकार्पण कार्यक्रममा बोल्दै उनले आफ्ना अभिव्यक्ति अन्कन्ट्रोल हुने गरेपनि विचार प्रवाहमा भने कहीँ पनि त्रुटी नभएको जिकिर गरे। ओलीले लोकतन्त्रलाई नेताहरुले भागी खाने भाँडा बनाउँदा त्यसको टिकाउ नहुने गरेको स्पष्ट पारे।

उनले लोकतन्त्रको विकल्प लोकतन्त्रै हुने भएकाले राजनीतिकलाई आफूले सोही अनुसार अघि बढाउने काम गरिरहेको बताए।

उनले भने, ‘राजनीति लोकतन्त्रका लागि चाहिने हो। वास्तवमा राजनीति के का लागि चाहिन्छ भन्दा लोकतन्त्रका लागि चाहिन्छ। लोकतन्त्र केलाई चाहिन्छ? जनतालाई चाहिन्छ, समाजलाई, देशलाई। अनि देशका लागि काम गर्दैन, समाजका लागि काम गर्दैन। जनताका लागि काम गर्दैन। दुई चार नेताको ठगी खाने भाँडो हुन्छ लोकतन्त्र भने त्यो लोकतन्त्र फेरि टिक्दैन। लोकतन्त्रको विकल्प फेरि लोकतन्त्र नै हुन्छ। तर कहिलेकहिले नराम्रो धक्का खान्छ लोकतन्त्रले। विकल्प अलि पछि प्रकट हुन्छ। अर्को रुपमा प्रकट हुन्छ। तर, त्यस बीचमा देशले ठूलो क्षति व्यहोरिसकेको हुन्छ। मैले संसदमा बोल्दा, अन्यत्र बोल्दा देशप्रतिको, जनताप्रतिको, त्यही निष्ठाका साथ बोलेको छु। तर मैले अघि नै भने अलि सावधानी साथ बोल्नुपर्ने रहेछ, होशियारीका साथ बोल्नुपर्ने रहेछ। दाहालजीले भनेजस्तै अनकन्टोल मिसाईल हान्ने हो। त्यसपाराले बोले। यसको अर्थ सावधानीको कमी हो। तर, विचारमा त्रुटी होइन। मिसाईल भन्ने ठिक ठाउँमा ताकेर हानेको छु। तर एउटा हान्दा पुग्ने ठाउँमा कहिलेकहिले ५/७ वटा हानेको छु। त्यसैलाई अन्कन्ट्रोल भन्नुभएको होला। मैले राजनीतिक शुरुदेखि नै अत्यन्तै निष्ठाका साथ गरेको छु। यसै अनुसार मेरो विचारधारा पनि प्रवाह भएको छ।

ओलीले आफना अभिव्यक्तिमा केही सावधानीको आवश्यकता भएको पनि आफूले पछिल्लो समय महशुस गरेको बताए।