नेपालका स्पिनर सुवास भण्डारीलाई आईसीसीले गर्यो कारबाही
१३ माघ २०८० ७:५१
फाइल तस्बिर
नेपालका स्पिनर सुवास भण्डारी अन्तर्रष्ट्रिय क्रिकेट परिषद् (आइसीसी)को कारबाहीमा परेका छन् । दक्षिण अफ्रिकामा जारी यू–१९ विश्वकपअन्तर्गत दोस्रो खेलमा पाकिस्तानविरुद्ध गरेको गल्तीको कारण उनी कारबाहीमा परेका हुन् ।
आईसीसीले सुवास भण्डारीलाई एक डेमेरिट प्वान्ट दिएको छ । पाकिस्तानविरुद्ध १४औं ओभरमा भण्डारीले शाहजैब खानलाई अनावश्यक बल फ्याँकेपछि उनको काँधमा लागेको थियो । त्यसै कारण उनी कारबाहीमा परेका हुन् ।
एक डेमेरिट प्वाइन्ट आगामी २४ महिनासम्म रेकर्डमा हुनेछ । यदि कुनै खेलाडीको २४ महिनाभित्र चार डेमेरिट प्वाइन्ट भएमा दुई खेलमा प्रतिबन्ध लाग्नेछ ।
नेपाल पहिलो खेलमा न्युजिल्यान्डसँग ६४ रन र दोस्रो खेलमा पाकिस्तानसँग ५ विकेटले पराजित भएको थियो । बिहीबार अफगानिस्तानलाई १ विकेटले हराउँदै नेपाल सुपर सिक्समा प्रवेश गरेको छ । अब नेपालले सुपर सिक्समा भारत र बंगलादेशसँग खेल्नेछ ।
प्रतिक्रिया