काठमाडाैं महानगरले खुलामञ्चमा फुटबल मैदान बनाउन लागेकाेप्रति अक्युपाई टुँडिखेलको आपत्ति

खुलामञ्चमा कुनै पनि भौतिक संरचना नबनाउन अक्युपाई टुँडिखेलले काठमाडौं महानगरपालिकालाई आग्रह गरेको छ। अक्युपाई टुँडिखेल अभियानका संयोजक विजय श्रेष्ठले आइतबार प्रेस विज्ञप्ति जारी गरी खुलामञ्चमा दुईवटा फुटबल मैदान बनाउने महानगरको तयारीप्रति ध्यानाकर्षण भएको जनाएका छन्। भौतिक संरचना निर्माण नगरी खुलामञ्चलाई खुला नै राख्नुपर्नेमा उनले जोड दिएका छन्।

‘जनताले ऐतिहासक समयकालदेखि आफ्नो हकअधिकारका लागि आवाज उठाउने खुला सार्वजनिक ठाउँ टुँडिखेललाई यथास्थितिमा जोगाएर राख्नुको कुनै विकल्प छैन,’ अभियानले भनेको छ, ‘यस मैदान सम्पदामा कुनै प्रकारको निर्माण वा हस्तक्षेप नितान्त गलत हो। परापूर्वकालदेखि संरक्षित रहँदै आएको घाँसेमैदानलाई निरन्तरता दिएर हाल ताला लगाइरहेको खुलामञ्च जनताका लागि खुला गरी बच्चादेखि वृद्धसम्मका जनतालाई आवश्यकताअनुसारको क्रियाकलाप गर्न दिन स्थानीय सरकारलाई यस अक्युपाई टुँडिखेल अभियान अनुरोध गर्दछ।’

खुलामञ्चमा फुटबल मैदान बनाउँदा लैनचौरकै अवस्था आउनेतर्फ सचेत पनि गराइएको छ। भूकम्प तथा प्राकृतिक प्रकोपको दृष्टिकोणले समेत खुलामञ्चको संरक्षण गर्नुपर्ने उल्लेख गर्दै अभियानले भनेको छ, ‘खुलामञ्च नागरिकका लागि खुला रहँदा नै बहुप्रयोजन र आफ्नो नयाँ कुरा सिर्जना गर्न सक्ने, पोख्न सक्ने थलो बन्न सक्छ। अन्यथा खुलामञ्चले लैनचौरको कृत्रिम फुटसल पार्क र त्यहाँको स्थानीयले जस्तै दुर्गति भोग्नुपर्ने कुरासमेत स्मरणयोग्य छ।’

खुलामञ्चमा फुटबल मैदान बनाउन खोजिए संघर्षमा उत्रिने अभियानले जनाएको छ। अभियानले भनेको छ, ‘टुँडिखेलको अभिन्न अंग रहेको खुलामञ्चमा केही निर्माण गर्नुभन्दा व्यवस्थापनमा जोड दिन अनुरोध गर्दछौं।’