पूर्वपश्चिम रेलमार्ग निर्माणका क्रममा आएका गुनासा सम्बोधन गर्दै अघि बढ्छौं : मन्त्री ज्वाला
२८ पुष २०८० १३:३७
भौतिक पूर्वाधार तथा यातायातमन्त्री प्रकाश ज्वालाले पूर्वपश्चिम रेलमार्ग निर्माणका क्रममा जनताका गुनासो सम्बोधन गर्दै सरकार अघि बढ्ने बताएका छन् ।
चितवनमा आज पत्रकारसँग कुरा गर्दै उनले रेलमार्ग अध्ययनका क्रममा बस्तीमा परेको भन्दै जनता आन्दोलित बनेको विषयमा सर्वपक्षीय छलफलबाट समस्याको समाधान निकाल्ने बताए । उनले भने, ‘जनताको गुनासो सम्बोधन गरेर अघि बढ्छौँ ।’ तत्काललाई अध्ययनको काम रोकिएको उनले जानकारी दिए ।
जनताको असन्तुष्टि र गुनासाका विषयमा आफ्नो ध्यानाकर्षण भएको उनले बताए । उनले भने, ‘आज हामी यहाँको अवस्था के हो, के कति क्षति हुन्छ भन्ने विषयमा छलफलबाट निष्कर्ष निकाल्ने छौँ ।’
जनप्रतिनिधि, दलका प्रतिनिधि र सरोकारवालाबीच आजै छलफल गरिने उनल बताए । पूर्वपश्चिम रेलमार्गाको रेखाङ्कनका विषयमा आफूहरू छलफलका क्रममा रहेको उनले बताए । विवाद आइसकेपछि काम अहिलेका लागि स्थगित गरिएको उनको भनाइ छ ।
वास्तविकता के हो र यसबाहेकका विकल्प के हुन सक्छन् भन्ने विषयमा छलफल गरेर जनताका गुनासो सम्बोधन हुने उनले बताए ।
फरक प्रसङ्गमा मन्त्री ज्वालाले सडक निर्माणका लागि बजेटका कारण समस्या भएको बताए । सडक निर्माणका लागि पर्याप्त बजेट नहुँदा आयोजना तीव्र रूपमा अघि बढ्न नसकेको उनले बताए ।
उनले भने, ‘३७ अर्ब रूपैयाँ बजेट घटाइएको छ, बजेट घटेपछि स्वाभाविक रूपमा आयोजना प्रभावित भएका छन् ।’
बजेटको अभाव र निर्माण व्यवसायीको ढिलाइले समेत समस्या भएको उनको भनाइ थियो । यी समस्या समाधान गर्दै अघि बढेको उनले बताए ।
बजेटका विषयमा अर्थ मन्त्रालयसँग छलफल गर्दै देखिएका समस्या समाधान गर्दै मन्त्रालय अघि बढेको उनले बताए ।
सम्बन्धित समाचार
प्रतिक्रिया