१० वर्षमा १० हजार मेगावाट विद्युत भारत निर्यात गर्ने सम्झौतामा हस्ताक्षर
१९ पुष २०८० १२:५२
गत जेठमा प्रधानमन्त्री पुष्पकमल दाहाल ‘प्रचण्ड’ को भारत भ्रमणका क्रममा भएकाे भारतले नेपालबाट १० वर्षमा १० हजार मेगावाट बिजुली किनेर लैजाने सम्झौतालाई अन्तिम रूप दिइएको छ । ऊर्जा, जलस्रोत तथा सिँचाइ मन्त्रालयमा बिहीबार आयोजित नेपाल-भारत ऊर्जासचिवस्तरीय बैठकमा यससम्बन्धी सम्झौतामा हस्ताक्षर भएको हो ।
मन्त्रालयका अनुसार सम्झौतामा नोपलका ऊर्जासचिव गोपालप्रसाद सिग्देल र भारतका ऊर्जासचिव पंकज अग्रवालले हस्ताक्षर गरेका हुन् ।
प्रधानमन्त्री दाहालको भारत भ्रमणका क्रममा भारतीय प्रधानमन्त्री नरेन्द्र मोदीले नेपालबाट १० वर्षमा लागि १० हजार मेगावाट बिजुली किन्ने घोषणा गरेका थिए ।
नेपाल र भारतबीच १० हजार मेगावाट बिजुली किनबेच गर्ने सम्झौताले अन्तिम रूप पाएपछि भने बिजुलीलाई वस्तुजस्तै किनबेच गर्न सकिनेछ । हाल नेपालबाट भारततर्फ साढे ६ सय मेगावाट बिजुली निर्यात हुँदै आइरहेको छ । यो सम्झौता सम्पन्न भएसँगै नेपाललाई बढी हुने सबै बिजुली भारत निर्यात हुनेछ ।
यसबाहेक बिहीबार नेपाल आएका भारतीय विदेशमन्त्री जयशंकरको भ्रमणका क्रममा तीनवटा प्रसारण लाइनसमेत उद्घाटन हुनेछ । भ्रमणका क्रममा नेपाल र भारतका विदेशमन्त्रीले संयुक्त रूपमा १२३ केभीए क्षमताको कटैया-कुशाहा प्रसारण लाइनको दोस्रो खण्ड उद्घाटन गर्नेछन् । यसबाहेक १३२ केभीए क्षमताकै रक्सौल-परवानिपुर प्रसारण लाइनको दोस्रो खण्ड र १३२ केभीए क्षमताकै नौतन्या-मैन्हिया प्रसारण लाइनसमेत उद्घाटन हुने ऊर्जा मन्त्रालयले जानकारी दिएको छ ।
प्रतिक्रिया