वैदेशिक रोजगारीमा पठाइदिने भन्दै १० करोड रूपैयाँ बढी ठगेको आरोपमा एक जना पक्राउ
१७ पुष २०८० १९:५७
विभिन्न देशमा रोजगारीमा पठाइदिने भन्दै १० करोड रूपैयाँभन्दा बढी रकम ठगी गरेको आरोपमा एक जना पक्राउ परेका छन् ।
सी स्टार ट्रेनिङ सेन्टरका सञ्चालक ललितपुरको कोन्ज्योसोम गाउँपालिका-१ का ४७ वर्षीय लालबहादुर लामालाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो।
प्रहरीका अनुसार उनले लिथुवानिया, क्यानडा, सिंगापुर जस्ता देशमा पठाउने भन्दै युवाहरूसँग ५ लाखदेखि १५ लाख रूपैयाँसम्म लिएका थिए ।
उनले रकम लिएपछि कतिपय रोजगारीमा जना पाएनन् भने कतिपय सिंगापुर पुगेपछि विमानस्थलबाट फर्काइएका थिए ।
पीडितहरूले दिएको उजुरीका आधरमा उनलाई मंगलबार दिउँसो काठमाडौंको शंखरापुरबाट पक्राउ गरिएको प्रहरीले जनाएको छ ।
उनको ट्रेनिङ सेन्टरबाट ९९७ थान राहदानी बरामद भएको छ भने प्रारम्भिक अनुसन्धानका क्रममा उनले युवाहरूबाट १० करोड रूपैयाँभन्दा बढी रकम उठाएको पाइएको छ । उनलाई थप अनुसन्धान र कारबाहीका लागि वैदेशिक रोजगार विभाग, ताहाचल पठाइएको छ ।
प्रतिक्रिया