नागरिक उड्डयन प्राधिकरणले गत आर्थिक वर्ष कमायो ३ अर्ब ४९ करोड रूपैयाँ नाफा

नेपाल नागरिक उड्डयन प्राधिकरणले गत आर्थिक वर्षमा ३ अर्ब ४९ करोड १५ लाख रूपैयाँ नाफामा गएको छ । आइतबार नागरिक उड्डयन प्राधिकरणको २५ औं वार्षिकोत्सव कार्यक्रममा बोल्दै प्राधिकरणका महानिर्देशक प्रदीप अधिकारीले पछिल्लो एक वर्षमा प्राधिकरणको सबै खर्च कटाएर खुद सञ्चालन मुनाफा ३ अर्ब ४९ करोड १५ लाख रूपैयाँ रहेको बताएका हुन् ।

उनले प्राधिकरणको आय एड्ओटिकलतर्फ ११ अर्ब ७२ करोड १७ लाख रूपैयाँ तथा नन-एड्ओटीकलतर्फ १ अर्ब ७८ करोड ८६ लाख रूपैयाँ गरी जम्मा १३ अर्ब ५१ करोड ३ लाख रूपैयाँ आम्दानी भएको बताए । उनले पुँजीगत खर्च तर्फ ७ अर्ब ४४ करोड ३८ लाख रूपैयाँ, कार्यसञ्चालन खर्चतर्फ ४ अर्ब २२ करोड ९९ लाख रूपैयाँ, आयकर तथा अन्य खर्चतर्फ ४ अर्ब १५ करोड ५ लाख रूपैयाँ गरी १५ अर्ब ८२ करोड ८३ लाख रूपैयाँ खर्च भएको उल्लेख गरे ।

उनले प्राधिकरण स्थापनाको पछिल्लो २५ वर्षमा हवाई उडान १९२ प्रतिशतले वृद्धि भएको बताए । प्राधिकरणका महानिर्देशक अधिकारीले हवाई उडानमा यात्रुहरूको संख्या पनि ३६४ प्रतिशत र कार्गो पनि १०० प्रतिशतले वृद्धि भएको बताए । उनले प्राधिकरणको आर्थिक वर्ष २०५६/५७ को आम्दानी ९१ करोड ८४ लाख रूपैयाँ रहेकोमा आर्थिक वर्ष २०७९/८० मा आइपुग्दा १३ अर्ब ५१ करोड रूपैयाँ पुगेर १५ गुणाले वृद्धि भएको बताए ।

उनले सन् २०२३ को अन्त्यमा आइपुग्दा ३ अन्तर्राष्ट्रिय विमानस्थलसहित आन्तरिक विमानस्थलको संख्या ५५ पुगेको बताए । उनले कारोना भाइरसका कारण आर्थिक रूपमा धराशायी हुन पुगेको उड्डयन क्षेत्र २०२२ मा सुधारोन्मुख हुँदै चालु अवस्थामा पुरानै अवस्थामा फर्किएको उल्लेख गरे ।

उनले सन् २०२३ डिसेम्बरसम्म हवाई उडानमा यात्रुहरूको संख्या कोभिडपूर्वको अवस्थामा फर्किएको बताए । उनले सन् २०२२ को नोभेम्बरसम्ममा त्रिभुवन र भैरहवा दुईवटा अन्तर्राष्ट्रिय विमानस्थलबाट अन्तर्राष्ट्रिय हवाई यात्रा गर्ने हवाई यात्रुको संख्या २९ लाख ४५ हजार ५ सय ४० रहेकोमा सन् २०२३ नोम्बेम्बरसम्ममा ३ वटा अन्तर्राष्ट्रिय विमानस्थलबाट हवाई उडानमार्फत यात्रा गर्ने यात्रुको संख्या ४१ लाख ५४ हजार ३९३ पुगेको बताए ।

उनले गत वर्षको सोही अवधिको तुलनामा यात्रुको संख्यामा ४१.०४ प्रतिशतले वृद्धि भएको तथ्यांक प्रस्तुत गरे । उनले आन्तरिक उडानतर्फ सन् २०२२ को नोबेम्बरसम्ममा कुल ५६ लाख ६८ हजार ९४१ हवाई यात्रुले यात्रा गरेकोमा सन् २०२३ नोभेम्बरसम्ममा ७७ लाख ९४ हजार २१७ पुगेर ३७.४८ प्रतिशतले वृद्धि भएको उल्लेख गरे ।