काठमाडौं महानगरलाई उज्यालो बनाउन खोज्दा प्रदेश सरकारले मुद्दा हाल्याे : बालेन शाह
२ पुष २०८० १३:५३
काठमाडौं महानगरपालिकाका प्रमुख बालेन्द्र साहले उपत्यकाको विकास एकसाथ हुनुपर्ने बताएका छन्।
सोमबार ललितपुर महानगरपालिकाको १०५ औं स्थापना दिवसका अवसरमा महानगरपालिकामा आयोजित कार्यक्रमलाई सम्बोधन गर्दै उनले यस्तो बताएका हुन्।
उनले उपत्यकाको सुन्दरतालाई बढाउन उपत्यकाका सबै महानगरपालिकाको विकास एकसाथ हुनुपर्ने बताए। उनले उपत्यकाको विकास एकसाथ गर्नका लागि संघीय र स्थानीय कानुन बाझिएका कारण असहज भएको बताए।
उनले संघीय सरकारका कारण फोहोर व्यवस्थापनमा समस्या भइरहेकाले फोहोर व्यवस्थापनको दीर्घकालीन समस्या समाधानका लागि कानुनको बाधा अड्चन फुकाइदिन प्रधानमन्त्री पुष्पकमल दाहालसमक्ष आग्रह गरे। उनले काठमाडौंको खोला अतिक्रमण रोक्न सरकारले आवश्यक पहल गर्नुपर्ने बताए।
प्रमुख शाहले काठमाडौं महानगरलाई उज्यालो बनाउन खोज्दा प्रदेश सरकारले मुद्दा हालेको भन्दै असन्तुष्टि व्यक्त गरे। उनले तीन तहकै सरकारले आवश्यक छलफल र समन्वय गरी अघि बढ्ने हो भने उपत्यकाको विकास चाँडो हुने बताए।
प्रतिक्रिया