पशुपतिनाथको धर्मभकारी थापेर पशुपति हिन्दू विश्वविद्यालय स्थापना गरिने

आराध्यदेव पशुपतिनाथका नाममा धर्मभकारी थापेर पशुपति हिन्दू विश्वविद्यालय स्थापना गरिने भएको छ ।

पशुपति क्षेत्र विकास कोषले पशुपति हिन्दू विश्वविद्यलय स्थापनाका लागि विद्वानसँग सुझाव लिन आज आयोजना गरेको कार्यक्रममा पशुपति हिन्दू विश्विद्यालय स्थापना तयारी समितिका संयोजक डा जगमान गुरूङले नेपाल सरकारको अनुदान नलिई धर्मभकारी थापेर भगवान् भोलेनाथले बर्साउने स्रोतले नै विश्विद्यालय स्थापना गर्न लागिएको जानकारी दिए । कोषले गठन गरेको समितिले शिवसङ्कल्पका आधारमा विश्विद्यालय स्थापना हुने गरी तयारी गरिएको जानकारी सो गराइएको हो ।

‘पशुपति र हिन्दू दुई शब्दले विश्वमा नेपालको आकर्षण बढाउँछ, विश्वका हिन्दू नेपाल आउने वातावरण बन्छ, यसले नेपालको शिर उच्च बनाउँछ, गोठाटारमा रहेको कोषको जग्गाको इशान कोणमा विश्वविद्यालय बनाउने गरी अध्ययन भएको छ,’ उनले भने ।

समितिका सदस्य एवं नेपाल पञ्चाङ्ग निर्णायक विकास समितिका पूर्वअध्यक्ष धर्मशास्त्रविद् प्रा डा रामचन्द्र गौतमले नेपालका संस्कृतिपरक दर्शनको अध्ययन अनुसन्धान गर्ने गरी विश्वविद्यालय स्थापना हुने बताए । मानव मात्रको विश्वविद्यालय बनाउने गरी कानुनको मस्यौदा भइरहेको उनले जानकारी दिए ।

विश्विद्यालयलाई राजनीतिक छायाका रूपमा नभई स्वतन्त्र प्राज्ञिक संस्थाका रूपमा स्थापित गर्ने समितिले गृहकार्य गरेको धर्मशास्त्रविद् गौतमले सुनाए ।

कोषका सदस्यसचिव राजुकुमार केसीले पशुपतिका नाममा स्थापना हुने विश्वविद्यालयलाई गोठाटारमा रहेको जग्गाबाट ठाउँ दिने व्यवस्था गुरूयोजनामा गरिएको जानकारी गराए । सांस्कृतिक अध्ययन अनुसन्धानको नमूनास्थलका रूपमा विश्वविद्यालयलाई अघि बढाइने उनको प्रतिबद्धता थियो ।

कोषका कोषाध्यक्ष नारायणप्रसाद सुवेदीले पछिल्लो समय पशुपतिनाथलाई सहयोग गर्ने भन्दा माग्नेको सङ्ख्या बढिरहेको बताउँदै विश्वविद्यालयका लागि भने सहयोग जुटाउन काम गरिने जानकारी गराए । ८२ प्रतिशत हिन्दू रहेको देशमा पशुपति हिन्दू विश्वविद्यालय स्थापना गर्दा देशको गौरव बढ्ने उनको भनाइ थियो ।

कोषका कार्यकारी निर्देशक डा घनश्याम खतिवडाले विश्वविद्यालयले कसैलाई सम्बन्धन नदिने गरी यसको स्वरुप निर्धारण गर्न लागिएको जानकारी गराए । कोषले गठन गरेको कार्यदलले सम्भाव्यता अध्ययन गरी प्रतिवेदन बुझाएपछि विश्वविद्यालय स्थापनाका लागि समिति गठन गरिएको उनले बताए ।

कार्यदलले बुझाएको प्रतिवेदन संस्कृति, पर्यटन तथा नागरिक उड्ययन मन्त्रालयले अध्ययन गरी अहिले शिक्षा, विज्ञान तथा प्रविधि मन्त्रालयमा पठाएको जानकारी पनि समितिको सदस्यसचिवसमेत रहेका कार्यकारी निर्देशक खतिवडाले गराए । शिक्षा मन्त्रालयले प्रतिवेदन स्वीकृत गरेपछि विश्वविद्यालय स्थापनाको प्रक्रिया अघि बढ्ने कार्यक्रममा जानकारी गराइएको थियो ।