महिलाविरूद्ध हुने हिंसा रोक्न सचेतना कार्यक्रम व्यापक बनाउनुपर्छ : मन्त्री आचार्य
२२ मंसिर २०८० २०:३१
महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले महिलाविरूद्ध हुने हिंसा उन्मूलन गर्न देशभर सचेतना कार्यक्रम व्यापक बनाउनुपर्ने बताएका छन् ।
लैङ्गिक हिंसाविरूद्धको अन्तर्राष्ट्रिय १६ दिने अभियानको अवसरमा सञ्चारिक समूह र कोसिस नेपालको संयुक्त आयोजनामा ‘मानसिक स्वास्थ्य र महिला हिंसा’ विषयक छलफल कार्यक्रममा मन्त्री आचार्यले सबै क्षेत्रका महिलालाई आफ्ना हक, अधिकारबारे अवगत गराइ महिलाविरूद्धका हिंसा उन्मूलन गर्न सचेतना कार्यक्रम व्यापक बनाउनुपर्ने बताएका हुन् ।
‘नेपालको संविधानले परिकल्पना गरेको समानुपातिक समावेशी र सहभागितामूलक सिद्धान्तका आधारमा समतामूलक समाजको निर्माण गर्ने व्यवस्था भए पनि सोहीअनुरूप कार्यान्वयन हुन सकेको छैन । अहिले पनि लैङ्गिक हिंसा रोकिएको छैन’ उनले भने , ‘जतिसुकै कानुनी व्यवस्था भए तापनि सचेतनाका कार्यक्रम बृहत् नगरेसम्म अवस्था यस्तै रहन्छ । सबै क्षेत्रका महिलालाई आफ्ना हक, अधिकारबारे अवगत गराई महिलाविरुद्धका हिंसा उन्मूलन गर्न सबैको सहकार्यमा जनचेतनाका कार्यक्रम व्यापक बनाउनुपर्छ ।’
मन्त्री आर्चायले संविधानले परिकल्पना गरेको समतामूलक समाज निर्माण गर्न समाजका हुने महिला हिंसाविरूद्धका विकृति विसङ्गतिलाई हटाउनुपर्ने बताए । ‘संविधान, कानुनमा भएका व्यवस्था प्रभावकारी रूपमा कार्यान्वयन नहुँदा समाजमा दाइजो प्रथा, यौन दुर्व्यवहार, अमानवीय व्यवहारलगायत महिलामाथि हुने हिंसा अझै व्याप्त छन् । समाजमा हुने महिला हिंसाविरूद्धका विकृति विसङ्गतिलाई नहटाएसम्म संविधानले परिकल्पना गरेको समतामूलक समाज निर्माण गर्न सम्भव छैन,’ उनले भने ।
महिला हिंसाविरूद्धको गतिविधि उन्मूलन गर्न लैङ्गिक हिंसाविरूद्धको अन्तर्राष्ट्रिय १६ दिने अभियानमा पुरुषको सहभागिता सुनिश्चित गर्नुपर्ने र महिलालाई आर्थिक रूपान्तरणमा सबल बनाउन महिला सशक्तीकरण गर्न जरूरी भएको उनले बताए ।
सञ्चारिक समूहकी अध्यक्ष विमला तुम्खेवाले पत्रकारिता क्षेत्रका निर्णायक तहमा महिला सहभागिताको आवश्यकता रहेको बताइन् । कोसिस नेपालका कार्यकारी निर्देशक मातृका देवकोटाले महिलाविरूद्धका हिंसाबाट पीडित तथा प्रभावित व्यक्तिमा जटिल प्रकारका मनोसामाजिक समस्याको प्रभाव पर्न नदिन संस्थाले महत्त्वपूर्ण भूमिका निर्वाह गरेको बताइन् ।
यस्तै कार्यक्रममा धनुषामा दाइजोको निहुँमा परिवारबाटै मारिएकी आरती साहका माइती पक्षले न्यायका लागि पहल गरिदिन आग्रह गरेका छन् । लैङ्गिक हिंसाविरूद्धको १६ दिने अभियान कार्यक्रममै सीमित भएको उनीहरुको आरोप छ ।
अभियानका नाममा होटेलहरूमा कार्यक्रम चलाउने र पीडितहरुका समस्याप्रति कसैले वास्ता नगरेको उनीहरूले बताए । पीडितलाई न्यायको माग गर्दै आफन्तहरू धर्नामा बसेको १६६ दिन पुगिसकेको उनीहरूको भनाइ छ ।
प्रतिक्रिया