विकट गुम्बागाउँमा बिजुली पुगेपछि स्थानीय खुशी

जिल्लाको जुगल गाउँपालिकाको विकट गुम्बागाउँमा विद्युतीकरण शुरु भएको छ। प्रतिनिधिसभा क्षेत्र नं. १ का  सांसद माधव सापकोटाले मङ्गलबार उद्घाटन गरे।

गत वर्ष सुरु भएको विद्युतीकरण कार्यक्रमअन्तर्गत जुगलका लेकालीगाउँ अम्बाखर्क, क्याङसिङ र गुम्बा गरी तीन गाउँमा बिजुली बलेको छ। पूर्वसभामुख अग्निप्रसाद सापकोटा र प्रतिनिधिसभा सदस्य माधव सापकोटाको प्रयासमा जुगल गाउँपालिका-३ का गुम्बा, क्याङसिङ र अम्बाखर्कमा बिजुली पुगेपछि स्थानीय खुशी भएका छन्।

माथिल्लो भेगका गाउँ तेम्बाथान, दीपु र तेगामा विद्युतीकरणका लागि प्रसारण लाइन निर्माण भइरहेको छ। यही रफ्तारमा काम हुँदा आगामी वैशाखसम्म बाँकी तीनवटै गाउँमा बत्ती बल्ने गाउँपालिका अध्यक्ष स्याङबोले बताए। चर्चित जुगल पर्यटकीय क्षेत्र हिमाल जाने बाबाखर्क, क्याङसिङ र गुम्बाका ३०० घरमा बिजुली पुगेपछि पर्यटकलाई सहज भएको छ।