नेपाली राजदूत अधिकारीले भेटे पाकिस्तानका विदेशमन्त्री
७ मंसिर २०८० १७:३६
पाकिस्तानका लागि नेपाली राजदूत तापस अधिकारीले पाकिस्तानका विदेशमन्त्री जलिल अब्बास जिलानीसँग भेटवार्ता गरेका छन्।
राजदूत अधिकारीले विदेशमन्त्री जिलानीसँग बिहीबार इस्लामावादस्थित उनको कार्यकक्षमा भेटवार्ता गरेका हुन्।
भेटमा नेपाल-पाकिस्तान द्विपक्षीय सम्बन्धका विभिन्न विषयमा छलफल भएको पाकिस्तानस्थित नेपाली दूतावासले जनाएको छ।
उनीहरूबीच आपसी हितका लागि सम्बन्धलाई थप विस्तार र सुदृढ बनाउने विषयमा पनि कुराकानी भएको थियो।
व्यापार र पर्यटनमा प्रचुर सम्भावना रहेको अनुभूति गर्दै नेपाल र पाकिस्तानबीच आर्थिक सहयोग अभिवृद्धि गर्ने उपायबारे पनि दुई पक्षले छलफल गरेका थिए।
उनीहरूले सार्क र क्षेत्रीय सहकार्यका साथै आगामी कोप-२८ का बारेमा पनि आ-आफ्नो धारणा राखेका थिए।
भेटमा पाकिस्तानको विदेश मन्त्रालय र त्यहाँस्थित नेपाली दूतावासका वरिष्ठ अधिकारीहरूको उपस्थिति रहेको थियो।
प्रतिक्रिया