जलवायु सम्मेलनमा भाग लिन मंसिर तेस्रो साता प्रधानमन्त्री युएई जाने
२४ कार्तिक २०८० १०:०४
प्रधानमन्त्री पुष्पकमल दाहाल प्रचण्ड जलवायु सम्बन्धी सम्मेलन (कोप–२८) मा सहभागी हुन युएई जाने भएका छन् । सम्मेलनमा प्रधानमन्त्रीको नेतृत्वमा मन्त्रीलगायत विज्ञ सम्मिलित रहेको प्रतिनिधिमण्डल युएई जाने भएका हुन् । त्यसको अन्तिम तयारी वन तथा वातावरण मन्त्रालयले गरिरहेको छ ।
जलवायु परिवर्तनसम्बन्धी संयुक्त राष्ट्रसंघीय संरचना महासन्धि (युएनएफसीसीसी)का पक्ष राष्ट्रहरुको २८औं सम्मेलन आगामी मंसिर १४ देखि २६ गतेसम्म युएईको दुबईमा हुँदै छ ।
प्रधानमन्त्री प्रचण्डका विकास व्यवस्थापन विज्ञ डा. पपुलुर जेन्टलले कोप–२८ मा प्रधानमन्त्री सहभागी हुने जानकारी बन मन्त्रालयले बिहिबार आयोजना गरेको एक कार्यक्रममा पुष्टि गरेका थिए ।
‘यस पटकको जलवायु सम्मेलनमा प्रधानमन्त्रीको नेतृत्वमा मन्त्रीलगायत विज्ञ सम्मिलित रहेको सशक्त प्रतिनिधिमण्डलले सम्मेलनमा भाग लिनेछ,’ उनले भनेका थिए ।
नेपालबाट हालसम्म तीन सम्मेलनमा मात्र राष्ट्र वा सरकार प्रमुख स्तरबाट सहभागिता भएको छ । सन् २००९ डेनमार्कको कोपहेगनमा भएको १५ औं सम्मेलनमा तत्कालीन प्रधानमन्त्री माधव कुमार नेपाल, सन् २०१८ मा पोल्याण्डमा भएको २४औं सम्मेलनमा तत्कालीन राष्ट्रपति विद्यादेवी भण्डारी र सन् २०२१ मा स्कटल्याण्डमा भएको २७ औं सम्मेलनमा तत्कालीन प्रधानमन्त्री शेरबहादुर देउवा नेतृत्वको प्रतिनिधिमण्डलले सहभागिता जनाएको थियो ।
अहिले प्रधानमन्त्री प्रचण्डले सहभागिता जनाउन लागेका हुन् ।
नेपालले सम्मेलनमा यसपटक ३० भन्दा बढी क्षेत्र र विषयबारे प्रस्तुति दिने गरी अन्तिम तयारी गरिरहेको छ ।
प्रतिक्रिया