खोटाङमा भेला भए १४ देशका ४० ख्यातिप्राप्त चित्रकार

खोटाङको प्रमुख व्यापारिक केन्द्र दिक्तेल बजारमा आजदेखि पाँचदिने ‘मुन्दुम अन्तर्राष्ट्रिय प्लेन एयर चित्रकला कार्यशाला तथा कला प्रदर्शनी-२०८०’ सुरू भएको छ ।

दिक्तेल रूपाकोट मझुवागढी नगरपालिका र धनु आर्ट स्टुडियो काठमाडौँको आयोजनामा जिल्लाको धार्मिक, सांस्कृतिक र पर्यटकीय क्षेत्रको विकास गर्दै पर्यटन प्रवर्द्धन गर्ने उद्देश्यले आयोजित सो प्रदर्शनी यही असोज २१ गतेसम्म सञ्चालन हुने छ ।

कार्यक्रममा क्यानभासमा लाइभ चित्र उतार्नका लागि नेपालसहित अष्ट्रेलिया, बङ्गलादेश, भुटान, चीन, इजिप्ट, भारत, जापान, लातभीया, लिथुआनीया, दक्षिण कोरिया, अमेरिका, युक्रेन, भियतनामलगायत १४ देशका ४० जना ख्यातिप्राप्त चित्रकार खोटाङ आइपुगेका छन् । नगरपालिकाको प्रमुख प्रवेशद्वार महुरेगढीबाट सुरू भएको कार्यक्रममा सहभागी चित्रकारलाई जिल्लावासीले भव्य स्वागत गरेका छन् ।

महुरेगढी बहुउद्देश्यीय प्राविधिक शिक्षालय नुनथलाबाट सुरू भएको कार्यक्रममा सहभागी स्वदेश तथा विदेशका चित्रकारले आजदेखि दिक्तेल रूपाकोट मझुवागढी नगरपालिकालगायत जिल्लाका अन्य महत्त्वपूर्ण ठाउँको दृश्यलाई क्यानभासमा प्रत्यक्ष उतार्ने नगर प्रमुख तीर्थराज भट्टराईले जानकारी दिए । ‘लाइभ चित्रकला कार्यशाला एवं प्रदर्शनी कार्यक्रमका लागि नेपालसहित विदेशी चित्रकार काठमाडौँबाट हिँडिसक्नुभएको छ । यो अवधिमा स्वदेश तथा विदेशका चित्रकारले करिब एक सयको हाराहारीमा क्यानभास पेन्टिङ तयार पार्नेछन्,’ उनले भने, ‘चित्रकारले उतारेका क्यानभास पेन्टिङलाई राखेर असोज २० गते दिक्तेल बजारस्थित माटीकोरे खेलमैदानमा चित्रकला प्रदर्शनीसहित स्थानीय परिकारको स्टल, सांस्कृतिक झाँकी, नृत्य प्रदर्शनलगायतका कार्यक्रम गर्ने तयारी गरिएको छ । यसले नगरको मात्र नभई जिल्लाकै पर्यटन प्रवद्र्धनमा सघाउ पुग्ने अपेक्षा गरिएको छ ।’

चित्रकारले क्यानभासमा उतारेका लाइभ चित्रकलालाई केही महिनापछि काठमाडौँ आर्ट ग्यालरीमा लगेर प्रदर्शनीको योजना बनाइएको छ । खोटाङको कला, संस्कृति र पर्यटनको प्रवद्र्धनका लागि दशवटै स्थानीय तहमा भएका पाखा, पखेरा, जङ्गल, खोल्साखाल्सी, खोँच, लेकबेँसीका साथै प्राकृतिक, सांस्कृतिक, धार्मिक, ऐतिहासिक, भौगोलिक स्थान, क्षेत्र र जीवनशैलिको सुन्दर पक्षको प्रचारका लागि लाइभ चित्रकला तथा कला प्रदर्शनी कार्यक्रमको आयोजना गरिएको हो ।

लाइभ चित्रकला कार्यशाला तथा प्रदर्शनीले खोटाङको ऐतिहासिक, धार्मिक तथा पर्यटकीय स्थानलाई राष्ट्रिय अन्तर्राष्ट्रिय रूपमा परिचित गराउन र ती स्थानको महत्त्व, संस्कृति, सभ्यता, धार्मिक तथा पर्यटकीय क्षेत्रको प्रवर्द्धनमा टेवा पुर्‍याउने दाबी गरिएको छ । चित्रकला कार्यशाला एवं प्रदर्शनीका अवधिमा तयार पारिएका क्यानभासलाई सङ्ग्रहालय बनाएर राखिने आयोजकले जनाएको छ ।

गत चैत १९ गते बसेको नगर कार्यपालिकाको बैठकले प्रत्यक्ष चित्रकला कार्यशाला एवं प्रदर्शनी गर्ने निर्णय गरेको थियो । लाइभ चित्रकला कार्यशाला एव कला प्रदर्शनीका लागि दिक्तेल रूपाकोट मझुवागढी नगरपालिकाका १५ वटै वडाबाट प्राकृतिक, सांस्कृतिक, ऐतिहासिक, भौगोलिक स्थान, क्षेत्र र जीवनशैलिको परिचय र पर्यटकीय महत्त्वसहितका तस्बिर प्राथमिकीकरण एव छनोट गरिएको छ ।

यस्तै जिल्लाका अन्य नौँ स्थानीय तहबाट प्राथमिकीकरण गरेर पठाइएका तस्बिरसमेत प्रत्यक्ष चित्रकलाका आकर्षण हुने जानकारी दिइएको छ । नगरपालिकाको १८ लाख खर्च रूपयाँमा सञ्चालन हुने कार्यक्रममा राई इज किङ उपाधिप्राप्त गायक राजेश पायल राईसमेत अउने आयोजकले जनाएको छ ।