एशियाली खेलकुद
भारतसँग २३ रनले पराजय व्यहोर्दै प्रतियोगिताबाट बाहिरियो नेपाल
१६ असोज २०८० ११:२४
एशियाली क्रिकेटअन्तर्गत चीनको हाङ्झाउमा आज सम्पन्न टी-२० क्वार्टरफाइनल खेलमा नेपाल भारतसँग २३ रनले पराजित भएको छ ।
भारतले प्रस्तुत गरेको २०३ रनको विशाल लक्ष पछ्याएको नेपालले ९ विकेट गुमाएर एक सय ७९ रन मात्र बनाउन सकेको थियो । यद्यपि भारतविरूद्ध नेपालको खेल प्रदर्शन निकै प्रशंसायोग्य थियो ।
नेपालका लागि दीपेन्द्रसिंह ऐरीले सर्वाधिक ३२ रन बनाए । यसैगरी कुशल भुर्तेलले २८, आसिफ सेखले १०, कुशल मल्लले २९, कप्तान रोहित पौडेलले ३, सन्दीप जोराले २९, सोमपाल कामीले ७, गुल्सन झाले ६, करन केसीले अविजित १८ तथा सन्दीप लामिछानेले ५ रन बनाए ।
भारतका खेलाडीहरू रवि बिस्नोई र अभेष खानले समान ३-३ विकेट लिएका थिए । अर्सदीप सिंहले २ तथा साई किशोरले १ विकेट लिए ।
यसअघि टस जितेर भारतले पहिले ब्याटिङ गरेको थियो । भारतका लागि यशस्वी जयसवालले एक सय रन बनाए । उनले ४९ बलमा शतक बनाएर नेपालमाथि दबाब बनाएका थिए । साथै ऋतुराज गायक्वाडले २५, शिभम दुबेले २५ तथा रिन्कु सिंहले आक्रामक ३७ रन बनाएका थिए ।
नेपाली बलर दीपेन्द्रसिंह ऐरीले २, सन्दीप लामिछाने र सोमपाल कामीले समान एक-एक विकेट लिएका थिए ।
यो हारसँगै नेपाल प्रतियोगिताबाट बाहिर भएको छ भने भारत सेमिफाइनलमा प्रवेश गरेको छ ।
सम्बन्धित समाचार
प्रतिक्रिया